Pertzepzio aldakorrak: Guggenheim Museoaren Panza Bilduma
Dan Flavin
James Turrell
Atalak
Hamish Fulton
- Izenburua:
- Hamish Fulton
- Erakusketa:
- Pertzepzio aldakorrak: Guggenheim Museoaren Panza Bilduma
- Gaiak:
- Artea eta denbora | Artea eta pertzepzioa | Eragin artistikoa | Ibilbide artistikoa | Sorkuntza artistikoa | Paisaia | Natura
- Artelan motak:
- Argazkia
- Aipatutako artistak:
- Fulton, Hamish | Long, Richard
Hamish Fulton-en (1946an jaioa) obra mundu guztiko paisajeetan zehar egin dituen ibilbideetan oinarritzen da, eta 1973az geroztik bere lanetako bakoitzak ibilbide zehatz bat erakusten du. Argazkiak manipulatuz eta irudiak eta testuak gainjarriz, Fultonek bere benetako artearen, hau da, ibilbidearen beraren urrutiko iradokizun bat egiten du, naturaren adierazpen tradizional eta errealistenen ordez.
Naturarekin zituen harremanak arte bihurtzeko erakutsi zuen interesa Londresko St. Martin’s School of Art-en egon zen aldian sortu zitzaion. Fultonek ez du paisajea era erromantiko edo nostalgiko batean lantzen, eta ikusitakoa ez du idealizatzen eta ez du betirako gorde nahi; aitzitik, natura trantsizio-egoera batean aurkezten du. Aldaketa egoera hori artistaren gorputzaren mugikortasunean islatzen da, ibiltzen ari den bitartean, eta batzuetan hedadura handiagoko beste gai baten adierazgarria da, hau da, giza iragankortasunarena. Titulurik gabea (Islandia) (1975eko udaberriaren bukaerakoa) triptikoan, adibidez, argazkiaren muturretan ebakitako bi hodei agertzen dira (baliteke hodeia bera izatea ikuspegi desberdinetatik). Artistak hodeien izaera iheskorrarekin konparatu ditu bere ibilbideak, hodeien etengabeko joan-etorriengatik. Denboraren eta espazioaren ibilbidea argazkietan islatuz, Fultonek zalantzan jartzen du paisajea jarrera estrategiko batetik esperimentatu eta erakusteko ohiko modua.
Bere lagun eta lankide den Richard Long-ek ez bezala, Fultonek ez du bere arrastoa paisajean utzi nahi, ez eta naturaren osagaiak bere estudiora eraman nahi ere. Fultonek esan bezala: “Ideia hauxe da, naturaren eragina jasotzen uztea, naturan eragina izan ordez. Ahalik eta arrasto txikiena utzi nahi dut”.