Kunsthalle Bremenen bildumako maisulanak: Delacroix-etik Beckmann-era
Kunsthalle Bremenen historia
Iruzkinak
Sarrera
- Izenburua:
- Sarrera
- Erakusketa:
- Kunsthalle Bremenen bildumako maisulanak: Delacroix-etik Beckmann-era
- Gaiak:
- Bildumagintza | Artearen historia | Künstlerstreit Bremen | Sorkuntza artistikoa | Die Brücke | Worpswedeko artista-kolonia | Kunsthalle Bremen | Alemania | Frantzia
- Mugimendu artistikoak:
- Erromantizismoa | Espresionismoa | Inpresionismoa | Post-Inpresionismoa
- Aipatutako artistak:
- Beckmann, Max | Corinth, Lovis | Degas, Edgar | Delacroix, Eugène | Friedrich, Caspar David | Liebermann, Max | Masson, André | Modersohn-Becker, Paula | Monet, Claude | Picasso, Pablo | Renoir, Pierre-Auguste | Slevogt, Max | van Gogh, Vincent
Ongi etorri Kunsthalle Bremenen bildumako maisulanak: Delacroix-etik Beckmann-era erakusketara. Alemaniako museoaren pinakotekako, eskultura bildumako eta estanpa eta marrazkien bildumako funtsetatik ekarritako maisulan hautatuekin osatutako erakustaldi honek Alemanian eta Frantzian XIX. mendean eta XX. mendearen lehen erdian egindako artea du ardatz. Ulergarriagoa izateko, hainbat ataletan banatua dago erakusketa, eta atal horietan bi herrialdeetako egileen piezak jasotzen dira, Erromantizismotik abiatu eta Inpresionismora, Postinpresionismora, Worpswedeko artisten koloniara eta Espresionismo alemanera hedatzen den diskurtso artistikoan integratuak.
Kunsthalle Bremenek eta Guggenheim Bilbao Museoak antolatutako erakusketa honetan Caspar David Friedrich eta Eugène Delacroix artista erromantikoen margolanak jartzen dira aurrez aurre. Horrez gain, besteak beste Claude Monet, Edgar Degas eta Pierre-Auguste Renoir bezalako inpresionista frantsesen lanak “Inpresionismo alemanaren triunbiratua” deritzoneko egileen lanen ondoan erakusten dira. Max Liebermann, Lovis Corinth eta Max Slevogt dira triunbiratu hori osatzen duten artistak. Van Gogh-en Mitxoleta-soroa ere ikusgai dago, museoak erosi zuenean polemika handia piztu zuen margolana, entzuteko gida honetan aurrerago azalduko den moduan.
Erakusketan Worpswedeko artisten koloniako margolarien lanak ere sartu dira, besteak beste Paula Modersohn-Becker-enak; artista horiek modernitatea bultzatu zuten Alemaniako artean.
Hautaketa amaitzeko, bertan dira Die Brücke (euskaraz, Zubia) taldeko kide izan ziren artisten lanak, eta baita Max Beckmann paregabearenak ere; André Masson-en eta Pablo Picasso-ren garaikideak izan ziren guztiak ere.
Informazio gehiago nahi baduzu Kunsthalle Bremeni buruz, eta erakusketa honetako obra askoren sorgune izan ziren Frantziako eta Alemaniako artista-kolonien giltzarriak ezagutu nahi badituzu, erakusketarako beren-beregi diseinatutako hezkuntza-gunea bisita dezakezu.
Kunsthalle Bremenen bildumako maisulanak: Delacroix-etik Beckmann-era erakusketa Iberdrolak babesten du.
Espero dugu zure bisitaz gozatuko duzula.