Jean-Michel Basquiat: Bada garaia

Koadro honetan, Busted Atlas 2, Basquiat-ek bere estilo zorrotz berritzailea aplikatu zion irudi klasiko bati. Greziar mitologian, Atlas astronomiaren eta nabigazioaren jainkoa da, eta berak eusten du zerua. Mila-urte luzetan irudikatu dute artistek, gehienetan lurra sorbaldaren gainean bermatzen duela. Hemen, berriz, Basquiatek ohiko irudi horri buelta eman dio, Atlasek besoak beheraka luzatzen baititu.

Gai klasiko horrekin batera, kaletik hartutako elementuak aurki ditzakegu, kalea izan baitzen Basquiaten artean aritzeko entrenamendu-tokia. Agerian den egurrezko egiturak bere lan goiztiarrenak ekartzen ditu gogora; izan ere, horietan hirian zehar aurkitutako material baztertuez egiten zituen, besteak beste. Estilo zorrotzak eta puntadunak, berriz, bere grafiti-artea ekartzen du gogora. Goian, eskuinaldean, bere bi marka tipiko agertzen dira: koroa eta copyright ikurra. Bi horiek SAMO sinadurarekin batera agertzen ziren bere grafitietan.

Kaleko arteari aipamen hori egiten dion arren, Basquiaten iturriak hurbileko hiri-ingurunea baino askoz zabalagoak ziren. Europaz kanpoko arteak lilura pizten zuen bere baitan: arte afrikarra, ozeanikoa eta azteka, baita Puerto Ricoko eta Haitiko bere ondarea ere. Pablo Picasso-ri eta estatubatuar Pintore Abstraktuei ere erreparatu zien, adibidez, Jackson Pollock-i, Cy Twombly-ri eta Willem de Kooning-i. Iturri horietatik edanez, bere lengoaia eta sinbolo artistikoak ondu zituen, eta horren emaitza ditugu artelan indartsuak, hauxe adibidez.