Niki de Saint Phalle
Katedral gorria (La Cathédrale rouge), 1962
Estatu-buruak (King Kong-erako estudioa) [Heads of State (Study for King Kong)], 1963ko udaberria
Iruzkinak
O.A.S. aldarea (Autel O.A.S.), 1962–92
- Izenburua:
- O.A.S. aldarea (Autel O.A.S.), 1962–92
- Erakusketa:
- Niki de Saint Phalle
- Gaiak:
- Artea eta erlijioa | Artea eta politika | Artea eta umorea | Sorkuntza artistikoa | Materiala | Sinbologia | OAS (Organisation Armée Secrète) | Kristautasuna | Aljeriako gerra | Animaliak artean
- Teknikak:
- Ensanblajea
- Aipatutako artistak:
- de Saint Phalle, Niki
New Yorken hazi zen Saint Phalle eta, katolizismoan hezi zuten, hura baitzen aitaren aldeko familiaren erlijioa. Helduarora iristean, bi lan-sortatan egin zion uko familiarengandik jaso zuen ondare hari: aldareak eta katedralak bildu zituen serie banatan. Bi serie horietako lehenengokoa da brontzezko muntaia handi hau.
O.A.S. aldarea lanean, Saint Phallek inoiz baino elementu heterogeneoagoak uztartu zituen brontzearekin: jostailu eta armekin batera, animalia disekatuak eta objektu erlijioso txikiak jarri zituen.
Arte kristauaren kodeetan ondo jantzia zegoen artista eta, horri esker, kode horiekin jolasteko aukera zuen. Triptiko batean, hau da, erretaulen ohiko formatuan, modu bortitzean kokatu zituen blasfemiazko elementuak. Kristo ere kendu zuen erditik eta haren ordez saguzar bat jarri zuen, hegoak zabalik. Herri-kultura batzuetan, ugaztun hegalari txiki hori banpiroen haragitze gisa hartzen da, Jainkoari bizkarra eman dion izakitzat. Gurutzefika ugari ere jarri zizkion; horietatik hiru, panel bakoitzaren ertz banatan, hainbat su-armaren tiro-bidean. Beste gurutzefika bat jarri zuen oinarrian, piramide-formako maila batzuen gainean. Estatuatxoak jarri zituen inguruan, eta gurutziltzatze-eszena nahasgarri bat sortu zuen: oinarrian latinezko INRI inskripzio (Nazareteko Jesus, Juduen Errege) ezagunaren ordez, OAS akronimoa ipini zuen. Aljeriako gerraren garaia zen Frantzian eta denek zekiten OAS hori zer zen: Organisation Armée Secrète (Armada Sekretuaren Erakundea), Aljeriaren independentziaren aurka aritu zen Frantziako eskuin muturreko erakunde frantsesa. Baina Saint Phallek, ohikoa zuen ironia erabiliz, beste esanahi bat eman zien inizialei, erabat bestelakoa: “Objet d’art sacré”edo “Arte Sakratuko Objektua”.