Niki de Saint Phalle
Sarrera
Biluzi arrosa paisaian (Pink Nude in Landscape), 1959
Iruzkinak
Autorretratua (Autoportrait), ca. 1958-59
- Izenburua:
- Autorretratua (Autoportrait), ca. 1958-59
- Erakusketa:
- Niki de Saint Phalle
- Gaiak:
- Emakumea artean | Artea eta emozioa | Eragin artistikoa | Sorkuntza artistikoa | Kolorea | Materiala | Erretratua eta autorretratua | Artea eta buruko gaitzak | Antoni Gaudí | Ferdinand Cheval | Henri Rousseau | Jackson Pollock | Jean Dubuffet | Jean Fautrier | Robert Rauschenberg
- Teknikak:
- Collage | Dripping
- Artelan motak:
- Pintura
- Aipatutako artistak:
- de Saint Phalle, Niki
Erakusketa honen abiapuntu dugu autorretratu bat, Niki de Saint Phalle-k autorretratua zela esplizituki adierazi zuen bakarra. 1959 inguruan egin zuen eta irudi honek baieztatu egiten ditu emakume gaztea zela Saint Phallek artearen inguruan zituen uste osoak: alegia, artista-bokazioak ekarritako erronkei aurre egingo ziela eta ez zuela inoiz zalantzarik izango bere arteak eskatzen zion aldaketa erradikalak egiteko.
Urte gutxi zeramatzan margotzen ospitale psikiatriko batean sei asteko egonaldia egin zuenean. Garai hari buruz geroago azaldu zuen artea zela depresioari aurre egiteko aurkitu zuen bide bakarra.
Pasio berri hartan murgildu zen eta bere kabuz ikasitako pintura eta collagearen nahasketa oinarri zituen estiloa asmatu zuen. Irudi honetan, adibidez, arroz-aleak, kafe-aleak, hautsitako ontzi-pusketak, botoiak eta hartxintxarrak erabili zituen. Koloretako zeramika-zatiak ere erabili zituen, Antoni Gaudí arkitekto kataluniarraren Güell parkeari zeharka aipamena eginez, Bartzelonara egin berri zuen bidaia batean asko miretsi baitzuen haren lana. Inoiz artista izateko prestakuntzarik jaso ez zuen arren, begi ona zuen arterako eta museo ugari bisitatzen zituen; garaiko arte giroaren eta joeren berri izateko. Eginiko bidaietan eta ikusitako arte-erakusketetan ezagutu zituen artista jakin batzuen lanak, inspirazioa ekarriko ziotenak, tartean, aipatutako Antoni Gaudí, Robert Rauschenberg eta Jackson Pollock estatubatuarrak, margolan abstraktuak egiten zituztenak, eta Henri Rousseau eta Ferdinand Cheval, Frantziako “naive” artista ezagunak. Dubuffet eta Fautrier ere sormenerako iturri oparoak izan zituen, baina Saint Phalle-ren lanek bi artista horien estiloarekin antzekotasunak badituen arren, urrundu egin zen haiengandik, kolorea biziki maite baitzuen.
Lan honetan, Jackson Pollocken teknika erabili zuen, mihise gainean pintura zipriztintzea alegia, autorretratuaren atzeko planoa sortzeko. Pinturak osorik hartu zuen mihisea.
Irudi hau sortu eta handik hilabete batzuetara, lanaren eskakizun handiak zirela eta, senarra eta Laura eta Philip seme-alabak utzi zituen, bere burua arteari eskaintzeko.