Jean Dubuffet. Abentura baten aztarna

Iruzkinak

Coucou Bazar, 1973

Bere irudi mugikorrak inspirazio-iturri zituela, hirurogeita hamarreko hamarkadaren hasieran, Dubuffet koadro bizidun baten ideia lantzen hasi zen, Coucou Bazarekin errealitate bihurtu zena. Hemen antzezlan horren zati mugikor ugarietako batzuk ikus ditzakegu, Praktikagarriak deitutakoak, baita jantzietakoren bat ere. Dubuffetek 20 jantzi diseinatu zituen horrelakoak, adibidez Nini la Minaude-rena, jendarmearena edo irudi garailearena. Oso oihal lodi batez eginak daude, eta jantzi horiek eramaten dituzten antzezleak oso poliki mugitzera behartuta daude, materialaren pisuak eraginda. Antzezleek eskulturak ematen dute, mozorroen eta orrazkera xelebreen atzean ezkutaturik. Coucou Bazaren antzezpen bakoitzean irudi bisuala etengabe aldatzen da objektuen eta antzezleen mugimenduarekin, ia ezer ez baita estatikoa. Izan ere, Praktikagarrietako batzuei elektrikoki eragin behar zaie. Obra honi buruz, Dubuffetek hauxe aipatu zuen:

“Ikusleak ez du dekoratu estatiko batzuen aurrean eszena bizidun batzuk behatzen ari deneko sentsazioa izan behar —antzerkian gertatu ohi den bezala—. Horren ordez, multzo baten aurrean egon behar du, zati guztiak bizirik dauden multzo baten aurrean, bazter guztietan eta momentu guztietan irudi birtual posibleak agertzen direnekoa”.

Dubuffetek behin eta berriro esan ohi zuen Coucou Bazar pintore baten obra zela, ez ordea antzerkigile edo koreografo batena, eta beretzat dimentsio berri batean pintatzea bezala izan zela. Horrez gain, irudi dudatsu eta ezegonkorren mundu bat iradoki nahi zuen aldi baterako konbinazioen eta transformazioen bidez. Coucou Bazar 1973an antzeztu zen lehen aldiz New Yorkeko Solomon R. Guggenheim Museum-en, Dubuffeti eskainitako atzera begirako erakusketaren barruan.