Azteken Inperioa
Sarrera
Lehenengo erakustokia
Iruzkinak
Sarrerako erakustokia: Xiuhtecuhtli eta Coatlicue
- Izenburua:
- Sarrerako erakustokia: Xiuhtecuhtli eta Coatlicue
- Erakusketa:
- Azteken Inperioa
- Gaiak:
- Artea eta erlijioa | Sinbologia | Erritua | Kolonaurreko kulturak | Azteken inperioa | Sakrifizioa | Natura | Erdialdeko Amerika
- Artelan motak:
- Eskultura
Aztekak hargin eta eskultore oso trebeak ziren. Erakustoki honetan dauden jainkoen bi eskultura apartei begiratuta, aztekek munduari buruz zuten ikuspegia artearen bidez nola adierazten zuten ikus dezakegu. Kosmosa funtsezkoa zen ikuspegi horretan: unibertsoa sistema ordenatu gisa ulertzen zuten, eta unibertso horretako elementu kontrajarrien arteko oreka perfektua lortzea zuten helburu. Ordena kosmikoa jainkoekin harremana izatean zetzan: gizakiek, bizirauteko, tratu ona jaso behar zuten jainkoen aldetik. Trukean, jainkoak gurtzen zituzten sakrifizioak eginez. Artea jainkoei eskerrak emateko edo haien haserrea baretzeko beste baliabide bat zen.
Jainko eta jainkosa nagusiak maiz azaltzen dira azteken eskulturetan, bai eta haien eraginpean gelditu ziren kulturen eskulturetan ere. Lurraren jainkosa, Coatlicue, elkarri loturiko sugeen gona bat jantzita azaltzen da hari eginiko irudian: Coatlicue izenak «suge gona» esan nahi du. Haren garezur itxurako aurpegiak turkesaz eta oskolez tartekaturiko mosaikoa azaltzen du oraindik. Coatlicue pertsona garrantzitsua zen, azteken jainko zaindari Huitzilopochtliren ama baitzen.
Xiuhtecuhtli jainkoaren estatua ikusgarri bat ere hemen dugu. Eguzki gisa dago irudikatuta, gizon gazte indartsuaren itxurarekin. Aldaken inguruan gerripekoa du lotuta, eta eguzki izpiz apaindutako kapa eta sandaliak ere ditu soinean. Begietan eta ahoan maskorra eta obsidiana izeneko kristal bolkanikoa ditu ezarrita. Horrela, itxura errealistagoa du. Buruko zuloetan giza ilezko xerloak izan zituen ziurrenik. Irudia gurtzarako erabiltzen zuten, eta eskuetan banderak izango zituen ziurrenik.