Azteken Inperioa

Iruzkinak

Hogeita bigarren erakustokia

Xochipilli-Macuilxochitl jainkoari egindako eskaintza hau Mexiko Hiriko hustubideen sistema eraikitzen ari zirela aurkitu zuten. Hala ere, data zehatza ez dakigu. Sistemaren eraikuntza hiriko katedralaren atzetik pasatzen zen. Orain Tenplu Nagusitzat—azteken tenplu garrantzitsuena zen— ezagutzen den lursailean zegoen. Xochipilli musikaren eta dantzaren jainko zaindaria zen. Azteken estilo geometrikoari jarraituz zizelkatu zuten. Besoak gurutzatuta ditu eta estandarte bati eusten dio. Buruan ohiko jantzia darama, gandorraren antzekoa. Alde bietan diskoak ditu zintzilik. Oraindik ere kolore gorriko aztarnak ikusten dira.

Jainkoa eskaintzaz inguratuta dago eta eskaintza horien artean ditugu, besteak beste, danborrak eta beste musika tresna batzuk. Eskaintza horiek gogora ekartzen dizkigute haren ohorez egiten ziren jaietako musika eta dantzak.

Mendeetan zehar horrelako aurkikuntza garrantzitsuak egin zituzten arren, 1978. urtea arte ez ziren hasi Tenplu Nagusiko indusketa lanak egiten. 1978ko otsailean aurkikuntza ikusgarri bat egin zuten Mexiko Hiriaren azpian. Sare elektrikoan lanean ari ziren langileek landutako harri bat aurkitu zuten bidean. Harri hartan aurpegi baten profila zegoen. Egun batzuk geroago monolito handi bat aurkitu zuten. Monolito hartan burua eta gorputzeko hainbat atal falta zituen emakumezko biluziaren irudia zegoen, erliebean eginda. Adituek Coyolxauhqui azteken ilargiaren jainkosatzat identifikatu zuten irudi hura. Mitoaren arabera, Coyolxauhqui jainkosa bere anaiak hil zuen, Huitzilopoxhtlik, hain zuzen ere. Hura zen eguzkiaren eta gerraren jainkoa. Borroka odoltsua izan zen, Coatepetl izeneko muino mitikoan.

Aurkikuntza horren ondoren jaio zen Tenplu Nagusiko proiektua. Poliki‑poliki azteken iragana ezagutu ahal izan zen, aurkikuntza garrantzitsuak zirela medio. Beraz, aztekei buruzko jakintza asko aberastu zen.