Azteken Inperioa
Bigarren erakustokia
Laugarren erakustokia
Iruzkinak
Hirugarren erakustokia
- Izenburua:
- Hirugarren erakustokia
- Erakusketa:
- Azteken Inperioa
- Gaiak:
- Bizitza | Heriotza | Artea eta erlijioa | Artea eta gizartea | Artea eta historia | Sinbologia | Harmonia | Azteken inperioa | Quetzalcóatl | Ingurunea eta natura | Animaliak artean | Erdialdeko Amerika | Mexiko
- Artelan motak:
- Eskultura
Erakustoki honetan Erdialdeko Amerikako jendearentzat garrantzitsuenetakoa izan zen animalia batean jartzen da arreta: sugean, hain zuzen ere. Sugea uraren, lurraren, infernuaren, odolaren eta gizonezkoen nahiz emakumezkoen emankortasunaren haragitzea zen. Sugeak azala aldatzeko duen gaitasuna dela eta, bizitzarekin, heriotzarekin eta hilezkortasunarekin lotzen zuten.
Horren garrantzi sinboliko handia izanda, lotura zuen jainko boteretsuenekin. Jainko batzuek hainbat animaliaren ezaugarriak zituzten nahastuta. Horren adibide bat dugu lumadun sugea. Lumadun sugea Erdialdeko Amerikako sinbolo erlijioso nagusia zen. Airean hegan egiten duen txoriaren eta lurrean narrasean doan sugearen nahasketa izanik, zerua eta lurra elkartzen diren tokia adierazten zuen. Era berean, aurkakoen arteko harmonia ere islatzen zuen. Azteken ustez, Quetzalcoatl jainko sortzaileak lumadun sugearen itxura zuen.
Hemen erakusten diren sugeen eskultura batzuk era errealistan irudikatu dituzte, kiribildutako gorputzekin, mihi zatibituarekin eta hortzekin. Beste irudi batzuk itxura fantastikoa dute eta sugearen eta txoriaren arteko nahastea erakusten dute.
Erakustoki honetako lan guztiek animaliek azteken bizimoduan izan zuten garrantzia egiaztatzen dute. Gurearen oso ezberdina den kosmosari buruzko ikuspegia zuten. Aztekentzat ingurumena ez zen gizakion nahierara ustiatu edo suntsitu behar zen zerbait. Ingurumena mantendu egin behar zela eta gizakien eta ingurumenaren arteko harmonia mantendu behar zela uste zuten.