Sekzioak | Intersekzioak. Guggenheim Bilbao Museoaren bildumak 25 urte
Francesco Clemente, Amaren gela, 1995–97
Miquel Barceló, Uholdea, 1990
Iruzkinak
Julian Schnabel, Espainia, 1986
- Izenburua:
- Julian Schnabel, Espainia, 1986
- Erakusketa:
- Sekzioak | Intersekzioak. Guggenheim Bilbao Museoaren bildumak 25 urte
- Gaiak:
- Zezena | Eragin artistikoa | Sorkuntza artistikoa | Kolorea | Lan-prozesua | Tamaina | Eskala | Testura | Guggenheim Bilbao Museoa | AEB | Antoni Gaudí | Pablo Picasso | Teknika eta materialak
- Mugimendu artistikoak:
- Neoinpresionismoa
- Artelan motak:
- Pintura (olio-pintura)
- Aipatutako artistak:
- Schnabel, Julian
Laurogeiko hamarkadan, Julian Schnabel artista estatubatuarra margolan pertsonalekin egin zen ezagun, besteak beste, Espainia izeneko lan monumental honengatik. Koadroaren gainazalak plater hautsien zati ugari ditu, masilla gogorarazten duen poliesterrezko erretxina batean txertaturik. Schnabelek olio-pinturazko geruza lodiz estali zituen zatiok, eta kolore biziko irudi distortsionatuak sortu zituen.
Schnabelek 1978an Bartzelonara egin zuen bidaia batetik hartu zuen inspirazioa, Antonio Gaudí arkitektoaren mosaikoak ezagutu ostean. Pinturetan baxera zatiak erabiliz, hautsitako plater eta katiluak pintzelkada horzdun eta eskultoriko gisa proiektatzen dira mihisetik: aldatu egiten dute plano piktorikoa, bai eta mosaikoaren ohiko azalera eraldatu ere
“Ez zitzaidan interesatzen patroiak sortzea edo tesela beiraztatuak diseinatzea, baizik eta plater zuriek pintura-planoa aldatzeko duten ahalmen islatzailea. Plateren erreflektantziaren eta pinturaren arteko desberdintasunak desoreka eragiten zuen plateren eta mosaiko kontzeptuaren artean, hautsi egiten baitzen homogeneotasuna.”
Espainia obraren erdialdean dagoen gorputzik gabeko burua behin eta berriz agertzen da Schnabelen lanean. Hemen, itxuraz, zezentoki batean egongo litzateke, ezkutaleku baten ondoan; hau da, toreatzaileak zezenarengandik babesteko erabiltzen duen egurrezko langaren alboan. Buruak zezena ez ezik toreatzailea ere gogoraraz dezake. Lehen begiratuan, irudiak Picasso-ren lanak ekar ditzake gogora; alabaina, Schnabelek iturri askotara jo zuen pinturak platerekin egiteko, hala nola Greco-ren koadroetara edo Mexikoko jatorrizko pieza arkeologikoetara. Kolore gorri eta okre lurkarek eta mihisea estaltzen duten itzal beltz luzeek nahita gogorarazten dute Espainiako paisaia.
Julian Schnabel funtsezko figura izan zen Amerikako Estatu Batuetako pintura neoespresionistaren sorreran, 1980ko hamarkadan. Artearen mundua hirurogeiko eta hirurogeita hamarreko hamarkadetan nagusi izan zen estetika minimalistatik eta Arte Kontzeptualetik urruntzen ari zen une hartan, norabide-aldaketa sakona markatu zuten pinturan Schnabelen lanaren eskala handiak, haren pintzelkada ausartek eta motibo figuratiboek.