Thomas Struth
Crosby Street, Soho, New York 1978
Iruzkinak
Sarrera
- Izenburua:
- Sarrera
- Erakusketa:
- Thomas Struth
- Gaiak:
- Artea eta gizartea | Ibilbide artistikoa | Sorkuntza artistikoa | Tamaina | Düsseldorfeko Eskola | Gogoeta | Bernd Becher | Gerhard Richter | Hilla Becher
- Artelan motak:
- Argazkia
- Aipatutako artistak:
- Struth, Thomas
Ongi etorri Thomas Struth argazkilari aleman ospetsuak lau hamarkadatik gorako ibilbidean egindako lanetan barrena eramango zaituen erakusketa honetara. Alde batetik, haren ekoizpen artistikoaren bilakaeran nabarmendu diren kezka sozialak aztertzen ditu erakusketak, eta, bestetik, artistaren ideiak eta sorkuntza-prozesua harremanetan jartzen ditu tematikoki lotuta dauden argazki ezberdinen bitartez. 130 lan baino gehiago jasotzen ditu erakusketak, ezezagunak diren zenbait sorkuntza-lan goiztiar eta ikerketa-materialak barne. Honako hau da, hain zuzen, egile honen lanari buruz gaur egun arte egin den erakusketarik handiena.
Thomas Struth 1954. urtean jaio zen. Gerhard Richter-ekin ikasi zuen pintura Düsseldorf-eko Arte Ederretako Akademian, eta, ondoren, 1976. urtean, argazkilaritzan zentratu zen. Struth izan zen, hain justu, Bernd eta Hilla Becher argazkilari handien lehenengo ikasleetako bat. Jenderik gabeko hiri-inguruneetan egin zituen lehenengo zuri-beltzeko argazki-sailekin lortu zuen nazioarteko ospea Struthek. Orduz geroztik, gai ugariren inguruko argazkiak egin ditu: museoetako bisitariak, familiak, baso eta oihanak, zientzia- eta teknologia-laborategiak zein industria-instalazioak . Planteamendu neurritsuari eta behatzaileari esker, eta, orobat, konposizio formalaren, kolorearen eta xehetasunen nagusitasunari esker, Europako argazkilari aipagarrienetako bat dugu Struth.
Struthen irudiak eskala handiko formatuagatik eta dentsitate bisualagatik dira ezagunak, eta beren berezitasun nagusia artistak bere buruari zein ikusleei egiten dizkien galdera aldakorrak dira. Artistaren argazkietan era askotako gaiak lantzen dira, hala nola eremu publikoaren garrantzia, naturaren eta kulturaren garrantzia, giza harremanen konplexutasuna, gizarte-egituren ezegonkortasuna eta teknologia berrien mugak eta aukerak. Artistaren kezka sozialak dira bere ekoizpenaren hari eroalea; horien bitartez, gainera, balio sozial eta etikoen eta giza balioen azterketan parte hartzera bultzatzen ditu ikusleak .