Thomas Struth

Iruzkinak

Grévy’s zebra (Equus grevyi), Leibniz IZW, Berlin 2017

2016an, teknologiari buruzko sailetan lanean ari zela, animalia basati hilen argazkiak egiten hasi zen Struth, Berlingo Ikerketa Zoologikorako eta Faunaren Ikerketarako Leibniz Institutuan. Faunaren kontserbazioaren alde diharduen Institutuan espezie askeen zein itxirik dauden espezieen bizi-historia eta egokitzapen ebolutiboak aztertzen dira, eta baita horiek gizakiekin eta ingurunearekin dituzten eragin-trukeak ere. Sail honetako animalia guztiak arrazoi naturalen ondorioz hil ziren.

Struthen argazkietan, animaliak oso modu zainduan daude enkoadraketan kokatuta, eta horrek memento mori gordina eta kezkagarria sortzen du: heriotzaren oroigarri bat. Irudietan ez dago giza ekintzaren arrastorik, animaliak azterketarako gorde eta beraiek kokatu izan balira bezala. Honela azaldu zuen Struthek: «Saiatu naiz animaliak modu duinean eta ederrean irudikatzen. Amore ematearen ideia interesatzen zait: nekez eraiki duzun zirkua, antzerkia, bertan behera geratzen da. Irudi hauek zapladen modukoak izan beharko lirateke, heriotza hor dela oroitarazteko deia».

Struthek bere proiektu guztietan egin ohi duen bezala, besteak beste, Durero edo Mantegna antzinako maisuei buruz dituen ezagutzez baliatu zen, eta baita pinturarekiko interes orokorraz ere, eta taxidermiari buruzko hainbat ikerketa egin zituen, argazkiak egiten hasi aurretik. Institutuko laborategiaren ordutegia zela eta, ordu gutxi izan zituen animaliei argazkiak egiteko, autopsia hasi baino lehen. Espazio hartan eskura zuen argiaz baliatuta, Struthek animalien zurden, lumen, atzaparren edo hortzen xehetasun intimoak hartzea lortu zuen, eta, horrela, haien aurreko bizitasuna eta bizitzaren ahultasuna gogorarazten dizkigu. Sentiberatasun eta dotoretasunarekin erakusten dira animaliak, eta bizitzaren eta heriotzaren artean geldirik baleude bezala agertzen dira.