Thomas Struth

Iruzkinak

Ekiloreak 1. zkia, Winterthur 1991

1990ean, Dieter Schwarz-ek, garai hartan Winterthur-eko (Suitza) Arte Ederretako zuzendari izanik, Thomas Struth-i eskatu zion argazkiak ateratzeko Zurichetik gertu zegoen zentro pribatu bateko, Lindbergeko ospitaleko, eremu berri bateko gaixoen geletan jartzeko. Gaixoak ospitalean zeudelako galtzen zituzten gauzetan zentratzea erabaki zuen Struthek, hala nola bertako paisaietan eta kolore biziko loreetan.

Struthek honela azaltzen du: «Ospitalean, gorputza hipersentiberatasun-egoeran dago, eta baita alarma egoeran ere. Horregatik pentsatu nuen loreen xehetasun bat nabarmentzea, gaixotasun egoerarekiko analogia bat egiteko asmoz, izan ere, egoera horretan, normalean erabat kontziente ez garen gorputzeko parte bat bihurtzen da gure arretaren gune nagusi».

Artistak Winterthur inguruko paisaiei, landareei eta loreei egin zizkien argazkiak, baita ospitalearen ingurukoei eta zentro medikotik hurbil zegoen Oskar Reinhart Museoaren lurretan zegoen lorategiari ere. Horrez gainera, Ingo Hartmann eta Hannah Erdrich-Hartmann bere adiskideen Düsseldorfeko lorategiko aihenzurien, arrosen eta beste lore batzuen «lore-erretratuak» egin zituen. Erretratu horiek naturaren ikuspegi familiarra eta «etxekotua» irudikatzen dute. Horietako batzuk ikusgai daude galeria honetan.

Winterthur-eko proiektuari esker, Struthek planteamendu piktorikoagoa hartu zuen bere argazkietan. Esperimentuak egin zituen zati batean desenfokatuta zeuden edo lausoak ziren irudiekin, eta kolore oso biziekin. Lehenengo plano botanikoak japoniar grabatuen eta marrazkien erreferentzia gisa ikus daitezke. Bestalde, geroagoko Struthen sail bateko inguru natural orokorragoen atarikoa ere badira: Paradisuko irudi berriak.