Thomas Struth
Paradisua 26, Palpa, Peru, 2003
Bental mendia, Golaneko Gainak 2011
Iruzkinak
Faez familia, Rehovot 2009
- Izenburua:
- Faez familia, Rehovot 2009
- Erakusketa:
- Thomas Struth
- Gaiak:
- Gizakia | Sorkuntza artistikoa | Lan-prozesua | Erretratua eta autorretratua | Gogoeta | Erbestea | Israel | Frédéric Brenner
- Artelan motak:
- Argazkia
- Aipatutako artistak:
- Struth, Thomas
2009 eta 2014 bitartean, sei aldiz joan zen Struth Israelera eta Zisjordaniara, guztiz jabetuta zer ondorio zituen artista atzerritar gisa bisitan joateak egoera politiko konplexuan sartuta zegoen inguru batera. Adi entzun zien gidei eta bidaietan ezagutu zituen gainerako pertsonei, eta inguru horri buruzko kontakizun konplexua irudi argigarriz osaturiko sail batean kondentsatzea erabaki zuen. Ikuspegi morala edo etikoa hartu beharrean, «eskualde hartako gatazkaren partikula bat» irudikatzea erabaki zuen.
Toki hau proiektuan parte hartzeko asmoarekin joan zen Struth Israelera, Frédéric Brenner argazkilari frantsesak gonbidatuta. Brenner ezaguna zen mundu osoko komunitate juduak dokumentatu zituelako. Struthez gainera, beste argazkilari butzuk ere deitu zituzten proiektu hartan parte hartzera: Wendy Ewald, Martin Kollar, Josef Koudelka, Jungjin Lee, Gilles Peress, Fazal Sheikh, Stephen Shore, Rosalind Fox Solomon, Jeff Wall eta Nick Waplington.
Brennerrek aurkeztu zion Struthi etxe modernoaren aurreko portxean erretratatuta agertzen den yemendar familia judu gaztea. Brennerrek berak atera zion argazkia aitari, Lewi Faezi, aitonarekin, haur bat zela, Yemenen; berriro atera zion argazkia Faezek hamahiru urte zituenean, eta, geroago, emaztearekin eta lehenengo semearekin. Bikoteak Israelera emigratu zuen gero.
Struthek Faez familiari egindako erretratu honek etorkinei eskatzen zaizkien aldaketa kulturalak iradokitzen ditu, baita gurasoen eta seme-alaben artean sortzen diren belaunaldi arteko aldaketak ere. Familiako erretratuetan egin ohi zuen bezala, espazioan nahi bezala kokatzeko esan zion artistak familiari. Argazkian ama eta alabak hiruki bat osatuz ikusten dira, aitaren eta semeen inguruan. Ezkerreko landareak zutik dagoen alabaren jarrera ekartzen du gogora.
Struthek azaldu izan duenez, Israelen eta Zisjordanian lan egitearen esperientziari esker jabetu zen bere asmo artistikoen benetako helburuaz: oro har gizakiari buruz hitz egingo duen osagairen bat edukiko duten argazkiak egitea, edozein dela ere horien gaia.