Thomas Struth

Iruzkinak

Bental mendia, Golaneko Gainak 2011

Struth-ek Israelen eta Zisjordanian egindako argazkietako askok ekartzen digute gogora artistak hasieratik beretik eremu publikoei argazkiak ateratzeko zuen interesa, ikuspegi luzeekin eta perspektiba sakon eta urrunekin. Alabaina, aldi berean, gatazkaren eta paisaian dagoen banaketaren seinaleak ikusten ditugu: errepide moztuak, metal eta hormigoizko hesiak, eta paisaia iraganezinak.

Paisaia zabal baten ikuspegi honetan bat egiten dute Israelen gatazka politikoko historiak eta turismo modernoak. Bental mendia, Golaneko Gainetan kokatua, Israelen iparraldean dago, eta itzalitako sumendi baten krater harritsua da; eskualdearen ikuspegi ikusgarriak eskaintzen ditu. Argazkian ikusten den behaketa postuarekin batera, israeldar gudarostearen muga-postu baten bunkerrak daude. Behean ikusten den bailaran gertatu zen, hain zuzen, Yom Kipurreko Gerraren gatazka odoltsuena, 1973. urtean.

Sail honetako argazki gehienetan ez bada ere gizakirik agertzen, artistak erretratu gisa deskribatzen ditu, eta honela hitz egiten du horiei buruz: «Paisaia bat giza esperientziarentzako eszenategi potentzialtzat baino ezin da hartu. Paisaia batek ez gaitu behar, ez ni, ez zu, ez inor. Eta interesgarria izan daiteke, baldin eta gizakiaren esperientziaren, proiekzioaren edo nahiaren plano bihurtu badaiteke».

Struthek aipatu izan duenez, diferente izango diren eta historian modu aktiboan parte hartuko duten lanak sortzea da bere asmoa. Argazki horien bitartez, Israeleko eta Zisjordaniako gaur egungo egoeraren irudi poliedrikoa irudikatzen du, eta erakusten du nola aldatzen duen oraingo gatazka batek eskualdearen geografia, bai eta paisaiari nola eragiten dion ere. Lanak deigarriak dira bertako osagaien konposizioak ez duelako kontakizun osoa agertzen. Badakigu horien atzean azalpena behar duten istorio sakonak daudela ezkutatuta, baina istorio horiek isilean gordetzen dira, eta, horrela, aukera dugu begiratzen eta gogoeta egiten jarraitzeko.