Thomas Struth
Publikoa 07, Florentzia 2004
Paradisua 24, Sao Francisco Xavier, Brasil 2001
Iruzkinak
Paradisua 01, Daintree, Australia 1998
- Izenburua:
- Paradisua 01, Daintree, Australia 1998
- Erakusketa:
- Thomas Struth
- Gaiak:
- Gizakia | Sorkuntza artistikoa | Kolorea | Tamaina | Gogoeta | Ingurunea eta natura | Herri-kultura
- Artelan motak:
- Argazkia
- Aipatutako artistak:
- Struth, Thomas
1990eko hamarkadaren amaieran, Struth koloretako argazkiak egiten hasi zen. Mundu osoko oihan oparoen eta tropikopeko basoen argazkiak dira, bisualki oso dentsoak eta horma-irudi baten tamainakoak. Australiako ipar-ekialdeko Daintree baso tropikalari buruzko sail batekin hasi zen. Eta, horren ondoren, argazkiak atera zituen Yunnan txinatar probintzian, Yakushimako uharte japoniarrean eta Bavariako basoetan, Alemanian.
Struthek New Yorken erakutsi zituen bere lan berriaren hamabi irudi, 1999. urtean, Paradisuko irudi berriak izenburuarekin. Berlingo Harresiaren erorketari, Gerra Hotzaren amaierari eta milurteko aldaketari buruzko gogoetek inspiratu zituen lan haiek, eta baita milurteko berrian munduak hartuko zuen bideari buruzko gogoetek ere. Argazkien eskalak eta xehetasunak behaketaren eta kontenplazioren esperientziari laguntzen diote, inondik ere.
Paradisua saileko irudi gehienek baso edo oihan bat ikusten den pantaila handi baten aurrean jartzen dituzte ikusleak. Ugariak dira horietan naturaren xehetasunak, baina ez dago besteen aurrean gailentzen den xehetasunik, eta ez dago, halaber, behaketaren esperientzia bera egituraz hornitzen duen ezer. Irudi ahistorikoak dira, ezer berezirik kontatzen ez duten irudiak. Niaren azterketari buruz jarduten dute, informazio bisuala prozesatzeko eta unearen kontzientzia areagotzeko moduari buruz.
Era berean, artistak onartzen du irudi horietako batzuk kultura jakin bati lotutako motiboetan inspiratuak daudela. Esate baterako, Yakushimako japoniar uhartean sortutako lan batzuek japoniar lorategien tradizioari egiten diete erreferentzia; aldiz, Bavariako irudiak basoaren gaia oinarri hartuta sortu dira, garrantzi handikoak baita gai hori literatura eta arte alemanean.
2000 eta 2007 urteen bitartean sailarekin jarraitu zuen Struthek, eta hainbat bidaia egin zituen Brasileko, Peruko, Hawaiiko eta Floridako baso tropikaletara. Paradisuko irudi berriak saila 36 lanek osatzen dute, guztira, eta eskala handiko irudiak dira denak. Museo-argazkiak sailean publikoaren mugimendu-aldaketen ondorioz harraldi ugari egin behar izan zituen Struthek. Paradisuko irudi berriak sailean modu sinpleagoan lan egitea erabaki zuen, eta planteamendu piktoriko intuitiboari jarraitu zion, hainbat urtez egin zuen taichiaren eraginpean.