Thomas Struth
Eleonor eta Giles Robertson, Edinburgo 1987
Akuarioa, Atlanta 2013
Iruzkinak
Artxiboa
- Izenburua:
- Artxiboa
- Erakusketa:
- Thomas Struth
- Gaiak:
- Arkitektura | Ibilbide artistikoa | Sorkuntza artistikoa | Konposizioa | Lan-prozesua | Perspektiba | Erretratua eta autorretratua | Astelehenetako Taldea | Düsseldorfeko Eskola | Artea. Materiala | Iran-Irak gerra | Musika
- Teknikak:
- Marrazkia
- Artelan motak:
- Argazkia
- Aipatutako artistak:
- Struth, Thomas
Areto honetan, Thomas Struth-en artxibo zabaleko eta sakoneko hainbat pieza ikusiko dituzu, besteak beste laneko materialak, kontaktu-orriak, fitxak, zirriborroak, gonbidapenak, kartelak eta bere erakusketen instalazioaren argazkiak. Artxiboko material horiek, kronologikoki ordenatuak, Struthen ibilbidearen bost hamarkada hartzen dituzte, eta haren lan-prozesuen eta garapen artistikoaren ikuspegia eskaintzen digute.
Erakusleihoaren hasierako multzoan, Struthen lehenengo marrazkiak ikusten dira, Düsseldorfeko Arte Ederretako Akademiara sartzeko eskaeraren paper-zorroan aurkeztu zituenak. Kalean, hiriko arkitekturarekin harremanean, marraztutako pertsonen estudioen zehaztasun handiak agerian uzten du artistak ingurunea aztertzeko eta ulertzeko duen erabakitasuna. Erakusleiho berean, Struthen lehenengo gustu musikalen hainbat adibide daude, LP eta CD albumetako azalen bilduman erakutsiak; horiekin batera dago 1978an New Yorken joan ohi zen patinaketa-diskotekaren postal bat.
Era berean, Struthen ikerketa-materialen aukeraketa bat dago ikusgai, baita komisarioekin eta beste artista batzuekin trukatutako irudiak eta gutunak ere. Horien artean, argazkilariaren interes politikoak eta taldeko hainbat proiekturen hastapenak erakusten dituzten zenbait pieza daude, esate baterako Rheinhafen, 1979an Düsseldorfen egindako argazki-saila, hiriko portu industriala dokumentatzen duena, hura eraitsi baino lehen. Eta baita Astelehenetako Taldea ere; horrela deitu zitzaion 1991. urtean, Irakeko Golkoko lehenengo gerrak ekarritako ziurgabetasunari erantzunez astero elkartzen zen artista-taldeari. Struthek taldeko kideen erretratu indibidualak egin zituen, eta 1992an erakutsi zituen, Alemaniako Kassel hiriko Documenta IX. erakusketan.
Aro aurredigitalean lan egin zuenez, Struthek bere argazkietan oinarritutako marrazkiak egiten zituen askotan, negatiboetan jasotako kale ezberdinak ezagutu ahal izateko. Marrazki horietako batzuk bere koadernoetan ikus daitezke. Marrazkiok, gainera, erakusten dute nola hasten den perspektiba zentralaren ideiatik urruntzen eta konposizio piktoriko askeagora metodikoki hurbiltzen.