Thomas Struth

Iruzkinak

Mendia, Anaheim 2014

Walt Disney-k berak diseinatutako Disneylanden jatorrizko egoitzan, Kalifornian dagoen Anaheim-en, Struth-ek aukera ezin hobea ikusi zuen aztertzeko nola bihurtzen diren irudimena eta fantasia herri-eskultura; eta nola hartzen duten mendi faltsuen, kobazuloen eta natura imitatzen duten egituren forma. Argazki honetako eszenak harri faltsuen eta benetako landareen konbinazioa erakusten du, eta eraikitako ingurune garaikidean erreala denaren eta ez denaren anbiguotasunarekin jokatzen du.

Hamarkada batez baino gehiagoz jardun du lanean Struthek Natura & Politika lan-multzoan. Lan horiek ikusten ez diren edo jendearentzat iristezinak diren lekuetan eta objektuetan zentratzen dira, ikuspegi bisualari eta gaiei dagokienez horien artean dauden ezusteko antzekotasunak nabarmentzeko helburuarekin. Disneylanden argazkiak ateratzeaz gainera, Struthek lan handia egin du, besteak beste, gune hauetan: Floridako Cañaveral Lurmuturreko Kennedy Zentro Espazialean, Berlingo Charité Ospitalean, Sonny Carter prestakuntza-zentroan, NASAk Houstenen, Texasen, duen Johnson Zentro Espazialetik hurbil, eta Eskoziako, Alemaniako eta Israelgo hainbat laborategi zientifikotan. Sail honetan erakusten da zenbat eratara politizatu diren natura eta ingurumena, nola sartu den politika ikerketa zientifikoaren alorrean eta zientziak giza gorputza eta ingurumena eraldatzeko dituen moduak.

Irudiek erakusten dute nola egiten duen aurrera esperientziak eta ezagutzak aurrerakuntza zientifiko izugarriak sortzeko, baina, aldi berean, nola bihurtzen ari diren herri xehearentzat eremu gero eta ulertezinagoak. Struthek etengabe eskatzen digu zalantzan jartzeko aurrerakuntza denari buruz dugun ideia, eta honela esaten du: «Guztiz barneratuta dugu aurrerapen teknologikoa dela benetan inporta duena, eta ez giza garapena, garapen politikoa edo soziala. Alderdi bakarra kontuan hartzen duen ikuspegia da hori, inondik ere...».