Thomas Struth
Crosby Street, Soho, New York 1978
Hannah Erdrich-Hartmann eta Jana-Maria Hartmann, Düsseldorf 1987
Iruzkinak
Pasaje de 27 Setiembre, Lima 2003
- Izenburua:
- Pasaje de 27 Setiembre, Lima 2003
- Erakusketa:
- Thomas Struth
- Gaiak:
- Artea eta espazioa | Arkitektura | Sorkuntza artistikoa | Argia | Kolorea | Tamaina | Gogoeta | Kolonialismoa | Lima | Alfons Hug | Malenkonia
- Artelan motak:
- Argazkia
- Aipatutako artistak:
- Struth, Thomas
Azken bi hamarkadetan, Struth-ek argazki berriak erantsi dizkie hirurogeita hamarreko eta laurogeiko hamarkadetan Europako eta Estatu Batuetako hirietan egindakoei. Kaleen lehenengo argazkietan egin zuen legez, Txinako, Japoniako eta Peruko hiri-paisaiak fotografiatu ditu, toki bakoitzera iritsi eta berehala egin ere, hiriari buruzko inpresioa fresko zuela.
2003. urtean egon zen Struth lehen aldiz Perun, Alfons Hug komisarioak gonbidatuta. Hugek Nazcako Lerro ezagunei argazkia ateratzeko iradoki zion, hau da, Nazcako basamortuan lurrean marraztuta dauden antzinako geoglifo erraldoiei. Alabaina, Struthentzat erakargarriagoa zen hiriburuaren, Limaren, ingurunea; izan ere, kolonialismoaren ondorengo arkitektura anonimoak eta ageriko jarraitutasun historikorik ezak malenkonia-aura ematen zioten hiriari. Limako koloretako argazkiek jenderik gabeko kaleak erakusten dituzte, eta argiaren izaera berezian jartzen dute arreta, bizitik lausora aldatzen baita egunean zehar. Limako argazkiak Limako Arte Museoan erakutsi ziren 2005. urtean.
Struthek beste hainbat hiritako leku zehatzen argazkiak ere egin ditu, tamaina handian, hiri horien ikuspegi epikoa argazki bakar batean erakusten duten irudi enblematikoak lortzeko helburuarekin. Bere erakusketetan, hainbat hiritan egindako argazki berdingabeak erakutsi izan dira, hala nola Las Vegasen, Shanghain, New Yorken, Dallasen, São Paulon, San Petersburgon eta Seulen. Kaleetan ateratako lehenengo argazkiak ez bezala, beste horiek lan indibidual gisa ikusteko sortu dira, ez sail baten barruan ikusteko. Kasu askotan, gainera, hiri-garapen berriak edo eraikitzen ari diren eremuak erakusten dira.
Txinan eta Korean indar hartzen ari diren hirien argazkien bitartez, Struthek gogoeta egiten du XXI. mendean bizkortasunez hazten ari diren ekonomien eta leku horietako etxe berrien eskala izugarri eta askotan gizagabearen arteko harremanari buruz. Kezka adierazi izan du: «botereak espazioaren gainean duen nagusitasun kezkagarria irudikatzen du garapen horrek, eta, halaber, erakusten du zer gaitasun dugun historia ezabatzeko edo hura alde batera uzteko, etorkizuna presaz eraiki nahiaren ondorioz».