Thomas Struth

Iruzkinak

Crosby Street, Soho, New York 1978

Thomas Struth-ek Gerhard Richter margolariarekin hasi zituenean ikasketak Düsseldorfeko Arte Ederretako Akademian, argazkilaritza interesatzen zitzaion, baina, batez ere, bere margolanen abiapuntu gisa. Kale batean jendeari argazkiak ateratzen ari zela, ordea, deigarria iruditu zitzaion zenbateraino zen hiria norbanakoaren atze-oihal arkitektonikoa. Horrenbestez, kalean bertan jarri zuen arreta, eta 20 x 31 cm-ko berrogeita bederatzi argazkiz osatutako koadrikula bat sortu zuen, Düsseldorfeko kaleei buruzkoa. Galtzadaren erdian jarrita egin zituen argazki guztiak, perspektiba zentralarekin, hau da, ikuspegi neutroarekin. Estilo zientifikoko koadrikula bat sortu nahi zuen Struthek, ikusleei aukera emango ziena irudien egitura bisuala aztertu eta konparatzeko, arreta konposizioaren osagaietan jarri gabe.

Pintura utzi, eta argazkilaritza ikasten hasi zen Bernd eta Hilla Becher argazkilari ospetsuekin. Bikotea estilo dokumentaleko irudiak egiteagatik zen ezaguna, bereziki Alemaniako arkitektura industriala erretratatzeagatik. Garai hartan, arte kontzeptualtzat hatzen ziren lan haiek. Argazkilaritzaren eta beste eremu batzuen artean, hala nola literatura, politika, ekonomia, pintura edo zinemaren artean, loturak ezartzera bultzatzen zituzten Bechertarrek beren ikasleak.

1977an, beka bat lortu zuen Struthek, New Yorken bederatzi hilabetez lan egiteko. Epe horretan, Manhattaneko hainbat auzoren argazkiak egin zituen, esaterako, Wall Street, Tribeca, Soho, Chelsea, Midtown eta Harlem auzoenak. Hiriko kaleen zuri-beltzeko berrehun argazki egin zituen bere-berea duen ikuspegi zentrala aplikatuta, oinezkoak eta ibilgailuak nabarmendu gabe. Struthi deigarria egiten zitzaion barruti batetik bestera giroa hainbeste aldatzea, eta alde horien arrazoiak bilatu nahi zituen. «Noren erantzukizuna da hiri baten izaera?», idatzi zuen. «Ezin konta ahala erabakiren pilaketa da hiri-egitura».

1978an, Struthek New Yorkeko berrogeita bost irudi aurkeztu zituen PS1 Studios izeneko erakusketa-aretoan. Aipatzekoa da arte garaikideari eskainitako erakusketa-gune garrantzitsu hura ikastetxe bat izan zela garai batean, eta, gaur egun, MoMA Arte Modernoko Museoaren parte dela. Erakusketa hartarako, Struthek bereizitako blokeetan, auzoka antolatu zituen kopiak, markorik gabe, horrela agerian uzteko eremu bakoitzaren giroa eta arkitektura bereizgarria. Erakusketa hartan lortu zuen lehenengo salmenta: hemezortzi irudi saldu zituen, bakoitza berrogeita hamar dolarren truke. Horri esker New Yorken gelditu ahal izan zuen beste bi hilabetez.