Thomas Struth

Iruzkinak

GRACE-Follow-On azpiko bista, IABG, Ottobrunn 2017

2017an, IABGen argazkiak ateratzeko baimena lortu zuen Struth-ek. Arlo aeroespazialeko eta defentsarako industriarako azterketak eta entseguak egiteko instalazioak dira, eta Ottobrunnen daude, Alemanian. Atmosferan, ozeanoetan, lurpeko uretan eta poloetako kasketetan gertatzen diren aldaketen jarraipena egiteko Lurraren inguruan orbitan dauden satelite bikietako baten beheko aldea erakusten du irudiak. NASAren GRACE esperimentuaren (Gravity Recovery and Climate Experiment) parte dira satelite hauek, eta esperimentuaren helburua da ulertzea zer bilakaera duen uraren zikloak eta Lurreko oreka energetikoak. Egituren barnealdearen eta sateliteen formen irudi honekin, gure munduaren konplexutasun intelektualaren beste ikuspegi bat eskaintzen digu Struthek.

2002 eta 2017 bitartean, GRACE esperimentuko nabe espazialetako bi Lurraren inguruan egon ziren orbitan, 90 minuturo, 350 eta 500 kilometro bitarteko altitudean, lurraren grabitateak haiek espazioan zuten posizio erlatiboei nola eragiten zien monitorizatzeko. Era horretara, zientzialariek Lurraren grabitazio eremuan gertatu ziren aldaketak erregistratu ahal izan zituzten hilabetez hilabete. Besteak beste, GRACEk neurtzen zuen Groenlandiako eta Antartidako izotz-galera, lurpeko ur-baliabideak zer lekutan murrizten ari diren edo zer lekutan ugaltzen, eta nola eragiten dioten lur lehorrek lehorteei eta basoetako suteei.

2018an, NASAk GRACE Follow-On sateliteak jaurti zituen, Lurreko klimaren, uraren eta energiaren zikloen bilakaera monitorizatzen jarraitzeko. Follow-On espazio-ontzietako osagaiak hainbat herrialdetan eginak dira, besteak beste Alemanian, Danimarkan, Ameriketako Estatu Batuetan, Frantzian, Erresuma Batuan, Italian eta Suedian. Berrikuntza gisa, tresna esperimental bat erantsi zaio misioari, sateliteen neurketen zehaztasuna nabarmen hobetzen duen laser batean oinarritua.