Guggenheim Bilbao Museoaren Bildumako maisulanak
Clyfford Still, Titulurik gabea, 1964
Anselm Kiefer, Bi ibaien lurra (Zweistromland), 1995, eta Gau-ordena ospetsuak (Die berühmten Orden der Nacht), 1997
Iruzkinak
Jorge Oteiza, Irekiera handia duen kutxa hutsa (Caja vacía con gran apertura), 1958, eta Bi triedroen elkartzeak sortutako kutxa metafisikoa. Leonardori omenaldia (Caja metafísica por conjunción de dos triedros. Homenaje a Leonardo), 1958
- Izenburua:
- Jorge Oteiza, Irekiera handia duen kutxa hutsa (Caja vacía con gran apertura), 1958, eta Bi triedroen elkartzeak sortutako kutxa metafisikoa. Leonardori omenaldia (Caja metafísica por conjunción de dos triedros. Homenaje a Leonardo), 1958
- Erakusketa:
- Guggenheim Bilbao Museoaren Bildumako maisulanak
- Gaiak:
- Artea eta espazioa | Eragin artistikoa | Esperimentazio artistikoa | Sorkuntza artistikoa | Espazioa | Geometria | Espiritualtasuna
- Artelan motak:
- Eskultura
- Aipatutako artistak:
- Oteiza, Jorge
Jorge Oteizak artearen espresibotasuna alde batera utzi zuen, eta erabiltzen zituen baliabideen bidez sortutako espazioaren eta hutsaren garrantzia azpimarratzea izan zuen helburu, eskulturan espazio hutsak duen balio erreala transmititzeko. Prozesuari ematen zion garrantzia, kasu honetan hustuketari, eta horregatik Oteizak behin eta berriro eskatu zuen lanak multzoka aurkez zitezela, ikusleak prozesua berregin ahal izateko; izan ere, ez zuen ikuslea hartzaile pasibotzat hartzen.
Ideia horiek artearen alderdi espiritualekin eta Oteizak zenbait artistaren, besteak beste, Kandinsky-ren, Mondrian-en eta Malevich-en lanaren inguruan egiten duen berrirakurketarekin zerikusi handia dute. Ideia horiek hezurmamitzeko irudi geometriko sinple eta purudun lanak egin zituen; esfera, kuboa eta zilindroa eta haien hustuketa dira lanen oinarri.
Kutxa hutsak eta Kutxa metafisikoak serieen parte dira bi artelan hauek eta Jorge Oteizaren azken lanen artean daude.
Kutxa hutsak serieko lanak sei koadrok osatu ohi dituzte; kubo ireki eta hutsak dira. Kuboek zati bat dute faltan, eta horri artistak Malevich unitate esaten zion. Serie honen adibide argia da Irekiera handia duen kutxa hutsa, 1958koa.
Leonardori omenaldia, 1958koa, Kutxa metafisikoen adibide argia da. Bi triedro elkartzean sortutako eskulturak dira; artistak nahita mugitu zituen, kuboa guztiz ez ahokatzeko. Horrela sortutako irekierak barruko eta kanpoko espazioa (edukia eta edukitzailea) lotzen ditu eta kuboa hausten du. Hartara zalantzan jarri zuen kuboa irudi ideala zela.
“Nire eskulturan gune espiritual librea behar dut niretzat, nire ondoan, hutsa dena, mugiezina, urrunekoa, gogorra —gogorra kanporantz, nolabait—, biluzia, protestantea —protestantea kanporantz, nolabait—, irtenbiderik gabea eta transzendentala”. [Oteizaren esana]