Guggenheim Bilbao Museoaren Bildumako maisulanak
Cy Twombly, Komodori buruzko bederatzi gogoeta (Nine Discourses on Commodus), 1963
Andy Warhol, Ehun eta berrogeita hamar Marilyn koloretsu (One Hundred and Fifty Multicolored Marilyns), 1979
Iruzkinak
Robert Rauschenberg. Gabarra (Barge), 1962−63
- Izenburua:
- Robert Rauschenberg. Gabarra (Barge), 1962−63
- Erakusketa:
- Guggenheim Bilbao Museoaren Bildumako maisulanak
- Gaiak:
- Artea eta industria | Artea eta emozioa | Sorkuntza artistikoa | Kolorea | Tamaina | Herri-kultura
- Mugimendu artistikoak:
- Espresionismo Abstraktua | Pop Artea
- Artelan motak:
- Argazkia | Pintura | Serigrafia
- Aipatutako artistak:
- Rauschenberg, Robert | Warhol, Andy
“Artistaren lana da haren garai historikoaren lekuko izatea”. [Rauschenberg-en esana]
Gabarra (Barge) ia 10 metroko zabalera duen oihal bakarra da; Rauschenbergek 1962ko urria eta 1964ko ekaina artean egindako hirurogeita hemeretzi margolan serigrafiatuen artean handiena da. Egilearen gai eta irudi gustukoenak aurki ditzakegu zuri, beltz eta grisean egindako eta zinema-pantaila baten antza duen lan izugarri honetan: hiri-ingurunea, sabai bateko ur-dorre batzuen forman ageri dena; garraiobideak, kamioi batek ordezkatuak; kirola, igerilariekin; artearen historiari egindako erreferentziak, Velázquez-en Venus ispilukoa lanaren zatia esaterako; eta espazio-esplorazioa eta hegaldiak, satelite baten, kohete baten, radar parabolikoen, eltxoen eta txorien irudiekin adierazita. Rauschenbergek 24 ordu baino gutxiagotan gauzatu zuen lan gehiena. Izenburuak bidaia bat, aldaketa bat, iradokitzen du, ibai eta kanaletan karga garraiatzeko erabiltzen diren ontzi handiak aipatzen baititu.
Haren konposizioek ahalmen espresibo handia bazuten ere, Rauschenbergek beraren lengoaia artistikoa aurkitu nahi zuen Espresionismo Abstraktutik urrunduz —garai hartan joera nagusia zen Espresionismo Abstraktua—. Komunikabideetatik eta erreprodukzio-teknika industrialetatik ateratako eta erraz ezagutzeko moduko irudiak erabiltzen zituen heinean, Pop Artearekin aldera zitekeen haren lana, baina haren hurbilketa ez zen Andy Warhol eta beste artista batzuenen modukoa, hain zuzen ere espresibitateari ematen zion garrantziagatik.
Ez zenez arte-mugimendu jakin batera atxikitzen, baina, era berean, lengoaia desberdinetako ezaugarriak sartzen zituenez bere lanean, estilo oso pertsonala, keinuzkoa sortu zuen; egileak argazkiak eskuz mugitu eta desitxuratu zituen, erreprodukzio-prozesuaren objektibotasun hotza ekiditeko. Eskuz margotutako guneekin zipriztindutako pusketa bisual nahasien multzoa da amaierako emaitza.
Hasiera-hasieratik, arteak bizitzarekin estu lotua egon beharko lukeela aldarrikatzen zuen:
“Mundua margolan erraldoitzat jo genezake”.