Guggenheim Bilbao Museoaren Bildumako maisulanak
Anselm Kiefer, Irudien gatazka (Bilderstreit), 1980
Anselm Kiefer, Eguzki-ontzia (Das Sonnenschiff), 1984–1995
Iruzkinak
Anselm Kiefer, Gilgamesh eta Enkidu zedro-basoan II (Gilgamesh und Enkidu im Zedernwald II), 1981
- Izenburua:
- Anselm Kiefer, Gilgamesh eta Enkidu zedro-basoan II (Gilgamesh und Enkidu im Zedernwald II), 1981
- Erakusketa:
- Guggenheim Bilbao Museoaren Bildumako maisulanak
- Gaiak:
- Pertsonaia mitologikoak | Artea eta historia | Artea eta literatura | Sorkuntza artistikoa | Alemania
- Artelan motak:
- Argazkia | Pintura
- Aipatutako artistak:
- Kiefer, Anselm
Anselm Kiefer-ek erabateko buelta eman zion artista-liburua genero gisa ulertzeko moduari; pintura klasikoaren pieza bakarraren eta intimoaren ideiara bueltatzen da, eta alde batera uzten du XVIII. mendetik aurrera sortutako artista-liburuen seriekako erreprodukzioa.
Gilgamesh eta Enkidu zedro-basoan II Kieferrek 1980ko hamarkadaren hasieran egin zituen zortzi liburuetako bat da. Gilgameshen epopeian, literatura unibertsaleko lehen artelanetako batean, oinarritzen da, eta argazkien bidez kontatzen digu.
Gilgameshen epopeia narrazio sumertarra da, neurtitzetan idatzia, Gilgamesh erregearen abenturei buruzkoa. Poemaren hasieran errege tiranikoa da Gilgamesh; Uruk hiriko herritarrek hari buruzko kexak azaltzen dizkiete jainkoei, neurrigabeko lizunkeriaz kokoteraino baitaude. Herria defendatzeko, jainkoek Enkidu gerlaria sortu zuten, erregeari aurre egiteko.
Bi pertsonaia horien arteko gatazka sortzean, elkar suntsitu beharrean, lagun egin ziren betiko, eta elkarrekin abentura zoragarriak eta aldi berean arriskutsuak bizi izan zituzten, besteak beste: Humbaba erraldoiaren heriotza, Zeruko Zezenaren heriotza eta Gilgameshek Inanna jainkosaren, maitasunaren eta gerraren jainkosaren eta Uruk hiriaren babeslearen, maitasunari uko egin izana.
Ekintza horiek guztiak direla eta, jainkoek, haserre, berriz ere zigortu zituzten bi adiskideak: Enkidu zendu zen, gazte zela, eta Gilgameshek hilezkortasunaren alferreko bilaketa hasi zuen.
Kieferrek ez du istorioaren kontakizun lineala egiten; zertzeladak emanez kontatzen digu. Hirugarren Reicheko eta Alemaniako tradizioaren oroitzapen pertsonalak islatzen dituzten zatiak kontatzen dizkigu. Horrela, beste lan askotan bezala, urrutiko lehenaldiko istorioa baliatzen du, berak bizi izan zuen garaiko bat kontatzeko. Bere hitzetan:
“Nire koadroak palinpsestoak bezalakoak dira, jatorrizko beste testu batzuk ezabatzen dituzten eta, aldi berean, beti ezabatzeko arriskuan dauden testuak bezalakoak”.