Espresionismo Abstraktua
Joan Mitchell: Agur egiten dizut, Tom (Salut Tom), 1979
Helen Frankenthaler: Europa, 1957
Iruzkinak
Philip Guston: Itsasbehera (Low tide), 1976
- Izenburua:
- Philip Guston: Itsasbehera (Low tide), 1976
- Erakusketa:
- Espresionismo Abstraktua
- Mugimendu artistikoak:
- Espresionismo Abstraktua | Sinbolismoa
- Artelan motak:
- Pintura
- Aipatutako artistak:
- Guston, Philip
Paisaia-pintura tradizional baten gisan, mihisea bi zatitan banatuta dago: goiko aldean zerua dago; beheko pintzelkada labur eta alboz albo jarriek, berriz, uraren gainazal distiratsua irudikatzen dutela ematen du. Baina izenburuak berak esaten duen bezala, ur-laster baten aurrean gaude itsasbeheran, eta horrek agerian uzten ditu identifikatzeko zailak diren elementuak.
Zein lotura du artelan honek Espresionismo Abstraktuarekin? Lehen begiratuan, zaila da zehaztea. Baina Philip Guston sortzailearen ibilbidea aztertzen badugu, gakoa aurkituko dugu.
Artista horrek Espresionismo Abstraktuaren teknika eta arauei jarraiki hasi zuen bere ibilbidea: intentzio figuratiborik gabe, emozioak biltzen zituen keinu piktoriko bat baliatzen zuen kolore eta formak lantzeko. Hala ere, 1960ko hamarkadatik aurrera figuraziora bueltatzeko bidea hasi zuen berriro.
Gaztea zenetik komikiaren eta karikaturaren estilo grafikoak erakarri izan zuen. Hori dela eta, figurazio mota hori eta Espresionismoaren keinutasuna bateratzen zituzten obrak egiten hasi zen. Hizkuntza sinbolikoaren bitartez, gainerako espresionista abstraktuek irudikatzen zituzten emozio berberak gogorarazten zituen: estutasuna eta atsekabea. Horretarako, ordea, emozio horiek iradokitzeko gai ziren objektu eta agertokiak irudikatzen zituen: miseriaz eta zikintasunez blaitutako hiriak, trafikoz betetako kaleak, bota militarrak, mutilatutako gorputzak... Gizarte garaikideko aurpegirik ilunena. Artistak figurazio satiriko eta kritiko bat bilatzen zuen, kaleko indarkeriak, manifestazioek, polizia-abusuak eta gerrak zikintzen zuten testuinguru sozial gris batean.
Kasu honetan, itsasbeherak aukera ematen digu hondoan zirkuluerdi formako lau objektu ikusteko, toki atsekabegarri batean. Bata bestearen ondoan dauden bunkerrak izan litezke. Omega alfabeto grekoaren azken letraren irudikapena izan liteke. Edo, agian, bota militar batzuen orpoak, tatxetez apainduak; Gustonen obran askotan errepikatu zen irudi bat da hori. Edonola ere, irudi ezkorra eta fatalista da, hasiera berri baten beldurretik sortu dena, nahiz eta itxaropen apur bat ere jasotzen duen. Irudiek sentsazioak gogorarazteko duten gaitasun aberatsarekin jolasten du artistak.