Espresionismo Abstraktua
Hans Hofmann: Estasia ezer hartu gabe (In sober ecstasy), 1965
Clyfford Still: Ph-950, 1950
Iruzkinak
Aaron Siskind: Chicago 8, 1948
- Izenburua:
- Aaron Siskind: Chicago 8, 1948
- Erakusketa:
- Espresionismo Abstraktua
- Mugimendu artistikoak:
- Arte Abstraktua | Espresionismo Abstraktua
- Teknikak:
- Ekintza-pintura
- Artelan motak:
- Argazkia
- Aipatutako artistak:
- Siskind, Aaron
Espresionismo Abstraktuko artisten artean, margolaria ez zen urrietako bat da Aaron Siskind. Artista honek frogatu zuen argazkilaritzak, irudi figuratiborik gabe, emozioak sortu eta historiak ere konta zitzakeela.
Siskindek argazkilaritza dokumentala eginez hasi zuen bere ibilbidea. Hala ere, berrogeigarren hamarkadatik aurrera New Yorken sortzen ari zen garaiko giro artistikoarekin harremanetan egon zen. Espresionismo Abstraktuko margolarien lagun egin zen eta haien lanekin paralelismo bat sortuz hausnarketa bat hasi zuen, mugimenduaren ideiak argazkilaritzara eramateko. Laster, argazki abstraktuak egiten hasi zen.
Hori lortzeko ez zuen efektu pilaketa baliatzen, esaterako, gaizki fokuratzea. Bere premisa honako hau zen: ezaugarri plastikoengatik iradokitzaileak zein adierazgarriak ziren errealitatearen zatiak hautatzea; ez zituen aukeratzen konnotazioengatik edota zentzu sinboliko tradizionalagatik. Horretarako, testuingururik gabeko xehetasunak hautatzen zituen, objektu gisa interpretatzeko zailak zirenak. Maiz, elementu lauei ateratzen zien argazkia, esaterako, hormei, eta askotan konposizio nagusiaren baitan beste konposizio batzuk sartzen zituen. Ezbairik gabe, errealitateari so egiteko modu berria zen hura.
Argazki hau premisa hori jarraituz egina dago. Horma arrunt bat da, Chicagoko edozein kaletakoa, margo zuriz zipriztindua. Artistak zipriztin hori aukeratu du espresuki, hormaren zati hori Espresionismo Abstraktuko margolariak egiten ari ziren konposizioen antzeko bat sortzeko. Ezkerretara, kolore zuria gailentzen da, eta protagonismo hori eskuineko aldean galtzen doa. Beltzaren gainean zuria egoteak koadro baten argazki baten negatiboa ekar dezake gogora, mihisearen azal zuriaren gainean beltza margotuta egongo balitz bezala.
Argazki makina bere gorputzaren luzapena izango balitz bezala ikusten zuen artistak; margolariek ere pintzelei buruzko antzeko ideia zuten. Ekintza-pinturak ekintza sortzaileari ematen zion garrantzia bera emateko, Siskindek segidak osatzen zituen. Hala, bere ekintza artistikoa ez zetzan mihisearen gainazalarekin behin eta berriz topatzean, baizik eta irudi baten etengabeko bilaketan, denboran objektiboaren bitartez irudi bat eta beste bat bilatzen aritzean.