Espresionismo Abstraktua
Jackson Pollock: Maskulinoa eta Femeninoa (Male and Female), 1942-43
Iruzkinak
[Espresionismo abstraktua]. Sarrera
- Izenburua:
- [Espresionismo abstraktua]. Sarrera
- Erakusketa:
- Espresionismo Abstraktua
- Gaiak:
- Bigarren Mundu Gerra
- Mugimendu artistikoak:
- Arte Abstraktua | Espresionismo Abstraktua
- Teknikak:
- Dripping
Guggenheim Bilbao Museoak ongietorria eman nahi dizu Espresionismo Abstraktua erakusketara. Londreseko Royal Academy of Arts-ek Guggenheim Bilbao museoarekin elkarlanean antolatu du, eta 130 lan inguru dituen erakusketa da; artelanak mundu osoko bilduma publiko eta pribatuetatik datoz. Mugimendua 40ko hamarkadaren erdialdean hasi zen garatzen AEBn, Bigarren Mundu Gerraren ondorengo testuinguru historiko, politiko eta sozialaren baitan, hain zuzen; lanek mugimendu horren gaineko ikuspegi zabala eskainiko digute.
Erakusketaren ikuspegi zabalak mugimenduaren giltzarriak ezagutzeko aukera emango digu: adibidez, Espresionismo Abstraktuaren ezaugarrietako bat artelan ez-figuratiboen sorrerara bideratutako pintura-keinuaren intentsitatea da. Hori da bere bereizgarri nagusietako bat: uko egiten diola objektuak, naturan dauden elementuak edo giza irudiak irudikatzeari. Beste hitz batzuetan esanda, abstrakzioa. Baina artistek emozioetan oinarrituta garatzen dute abstrakzio hori, eta, zentzu horretan, lehenengo abangoardietan integratuta zegoen Alemaniako Espresionismoaren oinordeko bilakatzen dira.
Hala ere, erakusketaren zabaltasunak eta aniztasunak mugimendu horren ñabardura guztiak zehazteko aukera ematen du. New York hiriarekin egiten den ohiko lotura gorabehera, Espresionismo Abstraktua beste leku batzuetan ere garatu zen: esaterako, Mendebaldeko Kostaldean eta, kasu bakan batzuetan, baita AEBtik kanpo ere.
Gainera, fenomeno horrek ez ditu soilik margolanak biltzen. Ibilbidean zehar ikusiko dugunez, Espresionismo Abstraktua beste adierazpide batzuen bidez ere garatu zen; esaterako, eskultura edo argazkilaritzaren bitartez.
Artistek erabiltzen zituzten teknika desberdinak ezagutuko ditugu, hala nola, Pollock-en bereizgarri zen dripping edo “tantak isurtzea”; edo kolore-eremuen erabilera, kritikariek maiz Mark Rothko-rekin lotu dutena. Eta artista hauen lan adierazkorren azpian dauden ideia estetikoak ere aztertuko ditugu, intentsitate emozional handiz beteta baitaude.
Didaktika atalean, garaiko politika estatubatuarrak AEBko Espresionismo Abstraktuaren garapenean izan zuen eraginari buruzko informazioa aurkituko duzu.
Espresionismo Abstraktua erakusketa BBVA Fundazioaren babesari esker gauzatu da.