Frank Gehry, arkitektoa

Atalak

Sarrera

1962an Frank Gehry-k Santa Monican (Kalifornia) bere estudioa zabaldu zuenean berenganatzen ari zen oraindik arkitektura modernoaren tradizioan jasotako prestakuntza eta bizi zeneko Los Angeles hiriko area metropolitarraren ezaugarriak. Hala eta guztiz ere, ondorengo hamarkadan bere estetika paregabea hasia zen antzematen landutako zenbait proiektutan. Proiektu haiek arkitekturan nagusitzen zen forma kubikoa goitik behera berriro planteatzea eskatzen zioten eta espazioaren tratamendu harrigarriagatik bereizten ziren. Gehryren arkitekturaren eta Los Angeles hiriko hizkuntzaren arteko sinergiak denbora gehiago behar izan zuen garatzeko, baina bere inguruneko
hiri-konplexutasunak bultzatuta sortu zituen diseinuetan erdietsi zen.

Bere ibilbidearen hasieratik Gehryk ohiz kanpoko materialak, horien artean hesi metalikoa eta metal uhinduna erabiltzeko izan duen joerak arkitekto ikonoklasta fama eman zion. Bere hiztegi originalak, materialek eskaintzen dituzten aukeren aurrean eta gaur egungo artista-lagunen eta laguntzaileen lanaren aurrean erakutsi ohi duen emaitza gisa sortuak, indar eta mugimendu sentsazio sakona eskaintzen die bere eraikinei. Formari buruz duen ikuspegi bereziarekin batera, bere estetika xumeak agerian uzten du eraikin harrigarrietan arkitektura eta eskultura bat egiteko duen sentsibilitatea. Izan ere, ondorengo proiektuetan arkitektura funtzionalaren eta forma eskultorikoaren artean Gehryk lortutako orekak ahalbide berriak zabaldu ditu arkitekturaren eremuan.

Erakusketa honek arkitektoaren lanaren ikuspegi orokorra eskaintzen digu eta jarraitzen duen diseinu-prozesu berezia agerian uzten du, bozeto erraz batzuetatik eta bloke sinple batzuetatik hasita. Hasierako soluzioarekin nekez geratzen da gustura, Gehryrentzat eboluzio eta lankidetza prozesu bat baita arkitektura, eta prozesu horretan hiru dimentsioko moldeak erabiltzen ditu proiektu bakoitzak eskaintzen dituen aukera anitzak aztertzeko. Azken urteotan, ordenagailuz lagundutako diseinurako eta fabrikaziorako programek bere proiektu handietan beti lortu nahi izan duen keinuzko kalitatea lortzeko aukera eman diote. Era berean, materialak berriro asmatzeko duen joerak beiraren, altzairuaren eta titanioaren erabilera berriak ezagutzea ahalbidetu dio. Azkenaldiko proiektuetan izan duen arrakastari esker, Gehryk arkitekto gutxik ezagutu duten gailentasuna lortu du eta gaur egun gure garaiko arkitekto originalenetako eta berritzaileenetako bat dugu.

Erakusketa honetako testuetan aipatzen diren neurriak sistema metrikoan (metroak, zentimetroak) zein sistema inperialean (oinak, hazbeteak) aipatzen dira arkitektoen nahia espresuki jarraituz.

Kontrakorik adierazten ez bada behintzat, erakusketa honetako material guztiak Frank O. Gehry & Associates-ek eskainiak dira.