Juan Muñoz. Atzera begirakoa
Eskailera kiribila (iraulia), 1984–1999 [205 aretoa - I pareta]
Iruzkinak
Sarrera
- Izenburua:
- Sarrera
- Erakusketa:
- Juan Muñoz. Atzera begirakoa
- Gaiak:
- Giza gorputza | Artea eta espazioa | Artea eta literatura | Artea eta pertzepzioa | Eragin artistikoa | Ibilbide artistikoa | Sorkuntza artistikoa | Kolorea | Perspektiba | Eskala | Eskulturagintza | Marrazkigintza | Dualtasuna | Egonezina
- Mugimendu artistikoak:
- Arte Garaikidea
- Aipatutako artistak:
- Muñoz, Juan
Ongi etorri Guggenheim Bilbao Museora. Atzera begirako erakusketa honek omenaldia egin nahi dio Juan Muñoz artistaren sortze-lanari. 1953an Madrilen jaioa, 1980ko hamarkadaren erdialdera nabarmendu zen Muñoz nazioartean, eta artean giza irudiari berriro heldu zion aurrenetakoa izan zen gainera. 2001ean hil zen, 48 urte besterik ez zituela, eta ordurako azken hogei urteetako eskultore gailenetakoen artean zegoen.
Artista konplexua eta oso berezia zen Muñoz, eta narratzailetzat zuen bere burua. Haren irudi eta objektuek, maiz monokromoak zirenek, oso muntaia zainduak eratu ohi dituzte kokatuta dauden moduagatik. Bere obrek eszenatoki kezkagarriak eta anbiguoak iradokitzen dituzte, behatzailearen pertzepzioari desafio eginez. Irudimenezkoa denaren eta errealitatearen artean sortzen den tentsioak izugarri liluratzen zuen Muñoz; hala, eskalarekin eta perspektibarekin jolas egiten zuen ikuslearen esperientzia zuzentzeko. Espazioaren eta irudiaren arteko harremana ere aztertu zuen, sarritan kezkagarriak diren obrak sortuz. Muñozek zioenez, bere sortze-lanak beste modu batera ulertu ezin zituen gauzak argitzeko balio izaten zion. Ezezaguna denaren bilaketa lan bat zen harentzat.
Muñozek iturri askotatik edan zuen: artetik hasi eta literatura, arkitektura, mitologia, filosofia, musika, zinema, poesia, antzerkia, magia eta ilusioa tartean direla, eremu horiek guztiek izan zuten eragina bere obran.
Batik bat eskultura landu arren, marrazkilari eta idazle bikaina izan zen Muñoz. Performance ugarietan ere parte hartu zuen, eta batzuk erakusketa honetan ikusi eta entzun ahal izango dituzu. Entzuteko gida honek ikusgai jarritako obra bakoitzari buruzko komentarioak entzuteko aukera emango dizu.