Artea eta Txina 1989 ondoren: Munduaren antzerkia

Iruzkinak

RMB City: China Tracyren (Cao Fei izenaz ere ezagutzen da) Second Life hiri-planifikazio bat eta Zeinen utopia?, Cao Fei

Pekingo Olinpiar Jokoak 2008ko abuztuaren 8an inauguratu ziren “Mundu bat, amets bat” lelopean.

Inaugurazio ekitaldien neurrigabekeriak Txinak munduko herri indartsu gisa bizi zuen gorakada agertzen zuen bitartean, artista txinatar batzuk ordurako hasiak ziren nazionalismo artifizial horri aurre egiten eta euren proiektu utopikoak sustatzen. RMB City proiektua, esaterako, Cao Fei artistak Second Life izeneko mundu birtualean diseinatutako metropoli kaotiko eta hazkunde azkarrekoa zen, eta Txina distiratsu haren bestelako bertsio bat erakusten du.

RMB City izena Txinaren dibisari zor zaio, renminbi izenekoa. Gune horretara sartzen denak badauka noria batean igotzea, abatar bat adoptatzea eta besle lagun abatar batzuekin topo egitea, eraikin pilaketa trinko horretan; erakinien artean, besteak beste, Rem Koolhaas arkitektuaren CCTV dorrea, Herzog eta Meuronen “Txori habia” estadioa edota Shanghaiko Ekialdeko Perla dorrea aurkituko ditugu. Horiek ziren, XXI. mendearen hasieran, Txina irudikaten zuten eraikin itzaltsuak. 

Hemen sar zaitezkete Cao Fei-ren komunitate birtualean. RMB City fantasiazko sorkuntza da, Olinpiaden garaiko metropoli txinatar bat islatzen duena, bere alderdi utopiko eta apokaliptikoekin.

Alderdi utopikoak ditu, nornahi izan gaitezkeelako, nortasun asmatu bat. Abatar bat bihur gaitezke, eta jendea bultzatu eta mugiarazi, sareko gune horretan joko zelai bat eraikitzeko. Baina ikusten dugu, halaber, Txinaren neurrigabeko hazkundearen alderdi iluna.

Hemendik hurbil, Cao Fei-ren Zeinen utopia? bideoa duzu ikusgai. Bonbilla lantegi batean filmatu zen, Cao-k esan zuenez, agertoki hark irudikatzen zuelako Txina “munduko fabrika” gisa aurkezten zuen ikuspegi berria. Lana gauzatzeko, artistak lantegiko langileei eskatu zien euren amets pertsonalak gogoratzeko, eta banan-banan grabatu zituen, euren ametsezko bizimodu hori antzezten zuten bitartean. Prozesu hartan, lantokiko hierarkia eraitsi zuen eta aldi baterako ordena sozial berria ezarri zuen.

Dantzaria izatea amesten duen neska bat agertzen da, eta lantegiaren erdian hasten da dantzan. Gizon bat ere ikusten dugu, helduagoa, taichi maisua dela amesten.

Bideo honen bukaeran, parte hartzaileetako batzuk euren kamisetetan osatzen dute “Nire etorkizuna ez da amets bat” esaldia, laurogeiko hamarkadako pop kantu baten leloa, eguneroko errealitatera itzularazten gaituena.

RMB City-ri buruz Cao Fei artistak egindako manifestutik:

“Nondik gatozen ikusten dugu, erreala eta birtualaren arteko gune hitsa betetzen duten “konexio” horietako batzuk aurkitzen ditugu, non konexio horien giltzarriak nahasten, aberasten eta guritzen diren. Ordena berriak sortzen dira, eta jakinduria berriak eta bitxiak ere bai”.