Pertzepzio aldakorrak: Guggenheim Museoaren Panza Bilduma
Bruce Nauman — Nire neurriz gaineko abizena 14 aldiz bertikalean
Hanne Darboven — 00-99=No 1-2K-20K
Iruzkinak
Bruce Nauman — Argi berdeko korridorea
- Izenburua:
- Bruce Nauman — Argi berdeko korridorea
- Erakusketa:
- Pertzepzio aldakorrak: Guggenheim Museoaren Panza Bilduma
- Gaiak:
- Artea eta espazioa | Artea eta pertzepzioa | Artea eta emozioa | Sorkuntza artistikoa | Argia | Gogoeta
- Artelan motak:
- Instalazioa
- Aipatutako artistak:
- Nauman, Bruce
Bruce Nauman-en Argi berdeko korridorea korridore estu bat da, bi paretaz osatua. Galeriako espazioaren barruan dago eta goitik argi berdea iristen zaio. Korridore hau ez da ohiko korridore bat, hau da, espazio batetik bestera joateko asmatua, bertatik ibiliz gero zugan sentsazio jakin batzuk eragiteko espazio bat baizik.
Sar zaitez korridorean barrena. Aurrera egin ahala, sentsazio berezi batzuk eragingo dizkizu ziurrenez. Pareta estuek itxi-sentsazioa eragin dezakete. Argi berdeak kezka edo deserosotasun-maila desberdinak sorraraz ditzake. Korridoretik irtetean, lasaitu eta liberatu egin zarela sentituko duzu ziurrenez. Gainera, beste modu batean antzemango duzu ingurunea, argi berdeak erreakzio optiko bat eragiten baitu, guztia purpura-kolorez ikusiko bazenu bezala.
Korridorean barrena aurrera jarraitzean desorientazio-sentsazioa sentitzen dugu. Esperientzia honen aurrean erreakzionatzen dugu eta horrela instalazioak geure erreakzioaz gehiago jabetzera bultzatzen gaitu. Izan ere, korridoreak gure jokabidea egituratzen duen modua da artelan honen osagaietako bat. Naumanek inguruneak gugan duen eraginaz pentsatzera bultzatzen gaitu, munduaren eta geure arteko elkarrekintzaz. Une batez, Naumanek gure jokabidea kontrolatzen du eta hori egitean, geure buruaz eta geure pertzepzio-eremuez gehiago jabetzera bultzatzen gaitu, inguruneak, inguruan dugun arkitekturak, bai eta ohiko “korridore” batek ere, gugan duten eragin sakona agerian utziz.