Pertzepzio aldakorrak: Guggenheim Museoaren Panza Bilduma
Robert Morris eskalari buruz hizketan
Richard Long [haren obraren inguruan]
Iruzkinak
Richard Long — Madrilgo Zirkulua
- Izenburua:
- Richard Long — Madrilgo Zirkulua
- Erakusketa:
- Pertzepzio aldakorrak: Guggenheim Museoaren Panza Bilduma
- Gaiak:
- Gizakia | Artea eta espazioa | Artea eta emozioa | Sorkuntza artistikoa | Forma | Geometria | Materiala | Ingurunea eta natura
- Mugimendu artistikoak:
- Arte Abstraktua
- Artelan motak:
- Argazkia | Eskultura | Kokapen zehatzerako artea
- Aipatutako artistak:
- Fulton, Hamish | Long, Richard
Richard Long artista britainiarrak Madrilgo museo batean 1986an burutu zen erakusketa baterako egin zuen obra hau lehen aldiz. Museorako zerbait beren-beregi sortu nahian, Segoviako harrobi bat bisitatu zuen, hainbat harri-bloke aukeratu zituen —guztiak molde eta tamaina jakin batekoak— eta erakustaretora eraman zituen, zirkulu-forma eratzen zutela antolatuz. Hortik datorkio obrari izenburua: Madrilgo zirkulua.
Longen obraren zati handi batean bezala, Madrilgo zirkuluak artifiziala eta naturala denaren arteko oreka adierazten du; kasu honetan, gizakiak egindako zirkulu-forma, eta harrien gainazal zimurtsu naturala. Museoaren espazioaren barnean harriak sartuta, Longek kanpokoaren eta barnekoaren arteko mugak ere lausotu ditu.
Longek bere obra honela deskribatzen du:
“Naturaren formen eta giza ideia abstraktuen —hala nola lerro eta zirkuluak— formalismoaren arteko oreka. Hemen egiten dute topo giza ezaugarriek eta munduaren indar eta forma naturalek”.
Longen obra erakusten den espazioaren arkitekturarekin ere jostatzen da. Madrilgo zirkulua obrak areto honen forma kiribilduak eta irregularrak azpimarratzen ditu. Gainera, bere obrak bake-sentsazioa ematen du, eta monumentu prehistorikoen misteriozko oihartzuna ere badu, zirkulu-forma duten Britainia Handiko Stonehenge-n edo Erromako Koliseoaren moduan.
Oro har, Longen lan artistikoa oinez ibiltzean datza, Hamish Fulton-ena bezala. Honen obra ere ikusgai dago solairu honetan. Egia esan, Arte Ederretako eskolara elkarrekin joan ziren, eta zenbait txango egin dituzte biak batera, artelanak egiteko oinarri izan dituztenak.
Bere eskulturak eratzeko, Long mundu osoan zehar ibili da, Zirkulu Artikoaren txokorik ezkutuenetatik Saharako Basamorturaino. Batzutan bidean leku ezkutuetan gelditzen da eta harriak, adarrak edo belarrak forma geometrikoak eratuz ezartzen ditu eta gero argazkiak ateratzen dizkie. Longek mapak eta testuak ere erabiltzen ditu bere txangoen erregistro gisa.
Longek zera esan du:
“Artelanaren helburua ez da edertasuna islatzea… ibiltzearen ideia ahal bezain zehatz ematea baizik”.