Giorgio Armani
Smoking itxurako soinekoa, A92.142
[306 aretoa]
Iruzkinak
Armani eta joerak
- Izenburua:
- Armani eta joerak
- Erakusketa:
- Giorgio Armani
- Gaiak:
- Artea eta moda | Ibilbide artistikoa | Sorkuntza artistikoa | Jantzi-diseinua
- Artelan motak:
- Diseinu-jantzia
- Aipatutako artistak:
- Armani, Giorgio
Moda-editoreak bat datoz: Armani ezaguna da joera iragankorren aurrean duen erabateko inmunitateagatik. Betidanik, modaren munduak, eta bereziki modari buruzko aldizkariek eta argitalpenek, diseinatzaileak presionatzen dituzte proposamen berriak eta iraultzaileak asmatu eta sor ditzaten. Izan ere, bere jantzi bat aldizkarien azaletan agertzea nahi duen edozein diseinatzailek ondo daki aurreko denboraldiko jantzien oso bestelakoa izan behar duela. Armaniren kasuan, begien bistakoa da moda-aldizkarietan agertzen dela; hala ere, ez du inolaz ere joeren mende egon nahi eta ez die beregandik bezeroek espero duten aisetasun eta erosotasunari uko egin nahi. 1995eko udaberriko bilduma aurkeztu zuenean, Women’s Wear Daily egunkariko moda-kritiko batek hauxe zioen gai horri buruz:
Women's Wear Dailyko kritikoa:
“Ederki, Giorgio! Guztia esanda eta eginda dagoenean, supermodeloek aurpegia garbitzen dutenean eta estilistak etxera joaten direnean, emakumeek janzteko beharra izaten jarraitzen dute. Eta gehienek arropa eder eta dotoreez jantzi nahi dute, gure bizimoduarekin koherentea den arroparekin. Eta horretan dihardu Giorgio. Desager daitezela joerak eta aurreko hamarkadetako joeren nahasketak; Armanik leial jarraitzen du bere bezeroekiko”.
“Asteartean erakutsi zuen bildumak liluratuta utzi zituen boutiquen jabeak eta beste pasarela batzuetako azaleko jokoak nabarmen geratzen lagundu zuen. Aste honen hasieran, oso bilduma anitza aurkeztu nahi zuela iragarri zuen. Eta hala izan zen. Inoiz baino gehiago keinu handiz eta ñabardura intimoz josita egon zen, ugariegiak izanik saio bakar batean asimilatzeko. Dena den, aniztasun horren guztiaren gainetik, sinpletasun eta bat-batekotasun sentsazioa nabari zen, orain hainbeste gaitzesten den beste elementu honetaz gain: gustu ona, alegia”.