L'Art en guerre. Frantzia, 1938-1947: Picasso-tik Dubuffet-era
Historia
Iruzkinak
Sarrera
- Izenburua:
- Sarrera
- Erakusketa:
- L'Art en guerre. Frantzia, 1938-1947: Picasso-tik Dubuffet-era
- Gaiak:
- Artea eta politika | Artea eta emozioa | Eragin artistikoa | Sorkuntza artistikoa | Sormena | Materiala | Erbestea | Bigarren Mundu Gerra | Nazismoa | Frantzia | Espetxea | Kontzentrazio-esparrua
- Mugimendu artistikoak:
- Surrealismoa
- Teknikak:
- Marrazkia
- Artelan motak:
- Eskultura | Pintura
- Aipatutako artistak:
- Bonnard, Pierre | Dubuffet, Jean | Matisse, Henri | Picasso, Pablo
Ongi etorri Guggenheim Bilbao Museora, L’Art en guerre. Frantzia, 1938-1947: Picasso-tik Dubuffet-era erakusketara. Bostehun lan baino gehiago daude ikusgai, ehun bat egilerenak. Pinturen, eskulturen, marrazkien, dokumentuen, argazkien eta filmen bidez erakusten zaigu artistek zein sakonki aldatu zuten artearen itxura eta edukia Bigarren Mundu Gerra eta nazien okupazio-garaian, zapalkuntza eta eskasia nagusi izan arren. Urteak igaro direnez, sasoi horri begi freskoekin begira diezaiokegu, eta hobeto uler dezakegu garai horrek izandako eragin izugarria hura bizi izan zutenengan. Erakusketak artearen izaera katartikoa irudikatzen du; eta, era berean, jendearen asmamena agerian jartzen du, bai askatasunaren alde borrokatzeko bai artearen bidez bere burua adierazteko.
Erakusketak 12 atal ditu, kronologikoki eta gaika banatutakoak. Hasieran, 1938tik 1947ra arteko historia azaltzen da, baita sasoi horretan agintariek sustatutako artea, hau da, gustu ofiziala. Ondoren, 1938ko urtarrileko Surrealismoaren Nazioarteko Erakustaldia aztertzen da: erakusketa horrek gertatzear zegoen aztoramenaren halako iragarlea izan zen. Hurrengo atalek zenbait garai eta gertakizun hartzen dituzte, hala nola, “gerra faltsu”aren garaia eta Frantziaren porrota, nazien okupazioa eta Vichyko erregimena. Atalotan, askotariko egoeratan eta askotariko artistek, ospetsuek zein ezezagunek, egindako lanak daude ikusgai. Frantziako atxilotze-esparruetan egindakoak dira batzuk; bertan zeudenek beren egoeraren berri emateko eta egoera latz hori jasateko (bizirauteko) eskura zituzten bazterkin eta material apurrez egindakoak. Beste batzuk Frantzian ezkutuan bizi ziren erbesteratuek eta errefuxiatuek sortu zituzten. Azkenik, omen handiko artisten lanak daude, adibidez, Matisse-renak, Picassorenak eta Bonnard-enak, bai artista gazteek eta batzuetan anonimoek egindakoak ere. Erakusgai dauden lan asko isilpean sortu zituzten. Gerra amaitu arte ez ziren jendaurrean erakutsi.
Didaktika-gunea dauka erakusketak. Bertan 1938 eta 1947 arteko kulturaren eta politikaren alorreko gertakizunen ardatz kronologiko bat dago, Frantzia gai nagusi duena. Horrez gain, erakusketa-katalogoa kontsulta daiteke korridorearen amaieran.
Erakusketa honako hauek antolatu dute: Musée d’Art Moderne de la Ville de Paris, Paris-Musées eta Guggenheim Bilbao Museoa; eta BBVA Fundazioaren babes eskuzabalak ahalbidetu du.
Erakusketaz gozatzea espero dugu.