Artea eta Txina 1989 ondoren: Munduaren antzerkia

Atalak

Huang Yong Ping (黄永砅)

Saguzarra proiektua I & II, 2003
Altzairua, panel akrilikoak, egurra, banbu-makilak, plastikozko xaflak, kartoia, saguzar disekatuak, agiri inprimatuak, hegazkin bateko xafla metaliko bat, kuterra, zuntzezko taula, argi-instalazioa eta argi-aplikeak; koloretako bideoa, soinuduna, 6 min.
Guggenheim Abu Dhabi

2001eko apirilaren 1ean, Estatu Batuetako EP-3 miaketa-hegazkin batek txinatar hegazkin militar batekin talka egin zuen airean, Txinako Hego Itsasoaren gainean. Txinatar hegazkina suntsitu egin zen, eta Estatu Batuetakoak larrialdiko lurreratzea egin behar izan zuen. Maiatzaren amaieran, Txinak eta AEBk akordio bat sinatu zuten EP-3 hegazkina desmuntatzeko eta AEBra itsasontziz eramateko. Gertaera hark bultzatu zuen Huang Yong Ping espioi-hegazkina egiazko eskalan berregitera, hiru zatitan banatuta. Artista lanean ari zela laster aurkeztekoa zen erakusketa baterako, Guangzhouko frantses kontsulatuak esku hartu zuen (Huang frantses herritarra da 1999az gero), eta proiektua bertan behera uztea eskatu zuen, arrazoi diplomatikoak zirela-eta.

2002an, obraren bigarren bertsio bat Guangzhoun erakusgai jarri behar zenean, Estatu Batuetako kontsulatuak protesta egin zuen, Txinako Atzerri Ministerioaren bidez. Veneziako 2003ko Bienala arte ezin izan ziren erakusgai jarri Saguzarra proiektua I eta Saguzarra proiektua II lanen zirriborro, argazki, dokumentu eta maketak.

Saguzarraren motiboa EP-3 espioi-hegazkinaren logotipotik aterea da, eta instalazioan literalki agertzen da, saguzar disekatu moduan. Huang hasieran hegazkinaren desegitearen eta botere politikoaren deseraikuntzaren arteko paralelismo sinbolikoan interesatua bazegoen ere, egilea bera bihurtu zen politizazioaren objektu.