Artea eta Txina 1989 ondoren: Munduaren antzerkia
Liu Zheng (刘铮)
Cai Guo-Qiang (蔡国强)
Atalak
Xu Bing (徐冰)
- Izenburua:
- Xu Bing (徐冰)
- Azpititulua:
- 1955
- Erakusketa:
- Artea eta Txina 1989 ondoren: Munduaren antzerkia
- Gaiak:
- Artea eta identitatea | Kultura eta globalizazioa | Dualtasuna
- Artelan motak:
- Instalazioa
- Aipatutako artistak:
- Xu, Bing
Transferentzia-kasu bat, 1994
Koloretako bideoa, soinuduna, 10 min
Artistaren eskaintza
Xu Bing izan zen 1980ko hamarkadako arte-mugimenduaren irudi nagusietako bat, eta milaka txinatar karakter berri, zentzugabe, baliatu zituen instalazio batengatik da famatua. Pekindik Estatu Batuetara alde egin zuen 1990ean, eta New Yorken hartu zuen egoitza. Aurrenekoz itzuli zenean Pekinera, 1994. urtearen hasieran, performance bat antolatu zuen, non bi txerri tintazko letrez estali baitzituen: arra alfabeto erromatarrez idatzitako hitz nahasiz eta emea berak asmaturiko karaktere txinatarrez, eta hantxe aritu ziren biak, arrak emea estaltzen zuela, Ekialdearen eta Mendebaldearen topaketa alegoriko, zentzugabe batean. Xu-k, bere belaunaldiko intelektual askok bezala, denboraldi bat eman zuen baserri batean Kultura Iraultzaren garaian, ohitua zegoen abere-hazkuntzarekin, eta artista txinatarrek Mendebaldeko “transferentzia” kulturalaren bidez ilustraziora heltzeko zuten desiraren kritika sakon eta literala zen performance hura. Zer gertatuko litzateke haiei eusten dieten oposizioei eta hierarkiei ezikusia egingo balitzaie edo haien ikurrak ezin “irakurrizkoak” balira? Obra hau, denborarekin, garai honetako arte esperimental txinatarraren funtsezko irudietako bat bihurtu da, eta nazioarteko ohore eta sari asko ekarri dizkio Xu-ri.
Honako dokumental honetan, artista txinatarrek, nazioarteko artearen mundu bateko herritarrak sentitzen zirelarik, eta autoatseginari kontra egingo zion erraietako errealismo bat baietsi nahian, zuzeneko performancea, argazkigintza eta bideoa erabili zituzten garai bat ageri da.
Hona zer zioen artistak:
“Obra hau animalien parte-hartzearekin egin da, eta espazio berezi bat nahi du sortu, non jendea bi txerriren jokamolde naturalari begira egon baitaiteken bere buruaz gogoeta egiten duen bitartean: nolako lotsa eta mugak sentitzen ditugun, geure ‘zibilizazioek’ markaturik, natura latzari aurre egin behar diogunean”.
Abere hauek ez zuten inolako kalterik ez estresik jasan performance honen prestakuntza eta aurkezpenean. Letrak txerrien azalean eskuz estanpatzeko, tintaz bustitako zurezko piezak baliatu ziren.