Making Africa. Gaur egungo diseinuaren kontinentea
Hitzaurrea
Iruzkinak
Sarrera
- Izenburua:
- Sarrera
- Erakusketa:
- Making Africa. Gaur egungo diseinuaren kontinentea
- Gaiak:
- Arte afrikarra | Eragin artistikoa | Sorkuntza artistikoa | Diseinua | Etorkizuna | Afrika
- Mugimendu artistikoak:
- Arte Garaikidea
Ongi etorri Making Africa – Gaur egungo diseinuaren kontinentea erakusketara. Zer da diseinua? Zer da Afrika? Eta, zer da Afrikako diseinua? Galdera horien erantzunak berriz aztertzeko garaia da, mundu osoa aldatzen ari baita. Erakusketa honetan, gainera, Afrikaren inguruan egiten dugun ohiko irudikapena jarriko dugu ezbaian: darabilgun ikusmoldeak zabalagoa behar baitu. Zalantzarik gabe, goseteaz, ustelkeriaz eta paisaia liluragarriez gain, badago besterik Afrikan. Eta Afrikako diseinuak birziklapenaz, usadiozko artisautzaz eta diseinu humanitarioaz gain, beste gai interesgarriago batzuetaz ere arduratzen da.
Ikusgai dauden lanak askotariko eremutakoak dira: objektu eta altzarien diseinua, arte grafikoak, ilustrazioa, moda, arkitektura, hirigintza, artea, eskulangintza, zinema eta argazkigintza; baliabide digital nahiz analogikoak ere azaltzen dira. Hemen ikusiko dituzun sortzaile eta diseinatzaileek diziplina baten eta bestearen arteko mugen artean egiten dute lan, eta, ondorioz, muga horiek lausotzen dituzte. Lanak kopuru txikitan ekoizten dituzte, baina askotan beste batzuekin elkarlanean egiten dituzte; sarritan, materialei bestelako erabilera bat ematen diete eta garrantzia handiagoa du prozesuak emaitzak baino. Artistak, maiz, arauetatik edo ohikotik kanpo garatzen den ingurua dute oinarri, eta autodidaktak izan ohi dira; gainera, haien lanetan gizartearekiko erantzukizuna islatzen dute.
Making Africa – Gaur egungo diseinuaren kontinentea erakusketaren ezaugarrietako bat izan da bere garapen-prozesua. Bi urte iraun duen ikerketa-aldian, hausnarketarako taldeak antolatu eta elkarrizketak egin zituzten Afrika osoko teorialariekin eta profesionalekin zein kontinentetik kanpo bizi diren afrikarrekin. Komisario, ikerlari, diseinatzaile, idazle eta arkitekto entzutetsuek aztertu dute zer den Afrika, nor den afrikarra, horrek haien lanean garrantzirik baduen, Afrikako diseinuaren moduko ezer existitzen den eta birziklapenaren edo informaltasunaren moduko kontzeptuak nola defini daitezkeen. Horrez gain ikertu zuten kontinentea bertako sormen–lanetan islatuta ote dagoen, eta, hala bada, nola islatzen den, eta diseinuak Afrikako etorkizunean zer leku duen . Ados egon ala ez, haien iritziak eta ikuspuntuak berritzaileak eta harrigarriak dira.
Okwui Enwezor-ek, 2015eko Veneziako Bienaleko komisarioak esan zuen moduan: “etorkizunean pentsatzea munduan dauzkazun aukeren inguruan pentsatzea da”.
Azkenaldiko aldaketa ekonomikoen eta politikoen eraginez, diseinu-munduan proposamen berritzaileak egin dituztela ikusiko duzu erakusketa honetan.