ERRUSIA!
Errege-ateak
Ama Birjinaren iragaitza
Iruzkinak
Sakkosa eta mitra
Toga eta mitra hauek Errusiako patriarkak janzten zituen, hau da, Errusiako Eliza Ortodoxoaren buruak, eta hamazazpigarren mendekoak dira.
Togari sakkos deritzo, Errusiako patriarkaren jantzietatik jai‑girokoena da. Garai horretako lekukotasunen arabera, sakkos hau Adrian patriarkarena zen. Italiako ehun bikainarekin egin zuten, 1691. urtean, eta lore eta hostozko marrazki dotorea du, zilar eta urre hariz brodatua. Lepoa, eskumuturra eta azpildura belus gorriz eginak dira, eta perlaz eta urre hari gehiagoz apainduak dira. Halaber, bi buruko arranoen, adarbakarren eta ugaritasunaren adarren irudiak dituzte. Esan bezala, jatorrian, Alexei Mikahailovich tsarraren zeremonia toga bat zen. Bidenabar, tsar hori Pedro Handiaren aita zen. Jantzi honek irudikatzen du, hartara, hamazazpigarren mendean Errusian elizak eta estatuak zuten harreman estua.
Mitra, berriz, burukoa da, eta apezpikuak zeremonietan erabiltzen du. Hamazazpigarren mendeaz geroztik, Errusiako mitrek koroa altua eta biribila dute. Gurutze-formako diseinu batek koroa zatitu egiten du elementu apaingarrien bidez. Mitra hau berebiziko adibidea da, bai harribitxien oparotasunari dagokionez, bai eta artisauen trebetasunari dagokionez ere. Haren gurutze formako diseinua perlazko lerro apaingarriz eta perla-zarten bidez eusten diren harribitxizko lerroz egina da. Mitraren goiko aldeko urrezko xafla biribilak Seinalearen Ama Birjina irudikatzen du. Bestetik, ertzetik hurbil diren lau medailoiek Gabriel eta Migel arkanjeluak eta Petri eta Paulo apostoluak erakusten dituzte, hurrenez hurren. Ezbairik gabe, mitra hau Kremlingo lantegietako artisauek egina da.