ERRUSIA!
Mikhail Vrubel, Bogatyr
Paul Gauguin, Solasa (Les Parau Parau)
Iruzkinak
Christian Cornelius Krohn, Sergei Shchukin-en erretratua eta Konstantin Korovin: Ivan Morozov‑en erretratua
- Izenburua:
- Christian Cornelius Krohn, Sergei Shchukin-en erretratua eta Konstantin Korovin: Ivan Morozov‑en erretratua
- Erakusketa:
- ERRUSIA!
- Gaiak:
- Artea eta politika | Bildumagintza | Artearen demokratizazioa | Sorkuntza artistikoa | Erretratua eta autorretratua | Museoak | Errusia | Ivan Morozov | Josef Stalin | Sergei Shchukin
- Mugimendu artistikoak:
- Abangoardia | Arte Garaikidea
- Artelan motak:
- Pintura
- Aipatutako artistak:
- Krohn, Christian Cornelius | Matisse, Henri | Picasso, Pablo
Bi erretratu hauek aurkezten dituzte Errusiako arte modernoaren garapenean funtsezkoak izan ziren bi pertsonaia: Sergei Shchukin eta Ivan Morozov bildumagileak. Moskuko merkatari aberatsak ziren biak, eta bilduma pribatu apartak egin zituzten maisulan modernistekin. Maisulan horiek gehienak Parisen bizi ziren Mendebaldeko Europako artistenak ziren. Esaterako, haiek Picasso‑ren eta Matisse‑ren lanak erosten zituzten, artista horiek mendebaldeko Europan artean behar bezala balioztatzen ez ziren garaian. Bere senari kasu egin zion bildumagile grinatsua izan zen Shchukin. Beti izan zuen gustuko artearen munduan berria eta puntakoa zena, eta artista berri bati edo biri, aldi berean, eskaintzen zien babesa. Morozov bildumagile zuhurragoa eta sistematikoagoa izan zen. Artista nagusien lanik onenak eskuratu nahi zituen, eta arte‑salerosleengana eta beste batzuengana jotzen zuen aholku eske.
1907an, Shchukin bere etxea irekitzen hasi zen igandero, museo gisa: ordudanik, bisitari guztiek haren margolanak ikus zitzaketen dohainik. Etxea Errusiako artista gazteak prestatzeko gune bihurtu zen. Erakusketako hurrengo zatian ikusi ahal izango duzu margolan hauek zer‑nolako eragina izan zuten Errusiako artisten lanean.
Iraultza boltxebikearen ondoren, gobernu sobietar berriak bi bildumak konfiskatu zituen, Estatuaren jabetza gisa. Shchukinek eta Morozovek mendebaldeko Europara emigratu zuten gero, beren arte altxorrak atzean utzita. 1923an, bi bildumak bateratu zituzten, eta Mendebaldeko Arte Modernoaren Estatuko Museoan jarri zituzten ikusgai. Hura izan zen abangoardiako arteari buruzko lehen museoa, munduan. 1948. urtea arte iraun zuen, Joseph Stalin‑ek kendu zuen arte, dekretu sekretu baten bidez, abangoardia subertsibotzat jotzen zuen eta. Lanak banatu egin ziren: batzuk Arte Ederretako Pushkin Museora joan ziren, Moskura; beste batzuk Hermitage Museora, garai hartan Leningrad izena zuen San Petersburgo hirira. Bi museo horietan izan ziren gordeta eta babesturik, harik eta Stalin hil zen arte.