ERRUSIA!
Sakkosa eta mitra
Rastrelli, Pedro I.aren erretratua
Iruzkinak
Ama Birjinaren iragaitza
- Izenburua:
- Ama Birjinaren iragaitza
- Erakusketa:
- ERRUSIA!
- Gaiak:
- Heriotza | Artea eta erlijioa | Kolorea | Konposizioa | Erlijio-margoa | Ikonoa | Errusia
- Artelan motak:
- Pintura
- Aipatutako artistak:
- Dionysii,
Ama Birjinaren iragaitzak Andre Mariaren heriotza adierazten du, hau da, Kristok haren gorpua eta arima zerura eraman zituen unea. Iragaitzaren irudi hau Dionysiik eta haren lantegiak egina da. Nabarmendu beharra dago, artista hori Errusiako ikono-margolari ezagunetakoa izan zela. Irudi erlijioso ugari baliatzen du, istorioaren xehetasun guztien berri ematearren. Ama Birjina heriotza ohean etzana dago, erdigunearen azpian. Albo banatan, apostoluak, aingeruak, eta Elizako Gurasoak ditu, zeremonia toga zuriak jantzita. Erdigunean, zerraldoaren atzean, Kristo bera ageri da, mandorla deritzon almendra itxurako argi batek inguratuta. Eskuetan, Ama Birjinaren arima du. Arima oihal zuriz bildua da, haur jaioberri baten antzera. Goian, apostoluak hegan doaz hodeien gainean, aingeruak lagun dituztela. Erdigunearen goiko aldean, Kristoren gainean, Ama Birjina eserita dago. Jantzi zuriak ditu, baina ez du mandorlarik. Goian ikusten diren bi aingeruek zeruko ateetan barna eramaten dute. Atzealdean, bi irudi txikiagoek Jefonias-en historia adierazten dute. Jefonias fedegabea zen, eta Mariaren zerraldoa iraultzen saiatu zen. Aingeru batek, baina, eskuak moztu zizkion. Baina Jefoniasek Ama Birjinaren santutasuna onartu zuen, eta eskuak berreskuratu zituen. Ikono honen konposizio landuak batetik, eta koloreak —jai giroko gorria, morea, turkesa, okrea, zuria eta urdina— konbinatzeko moduak bestetik, gertakizun loriatsu eta bozkariotsu baten irudi ikusgarria sortzen dute.