ERRUSIA!
Paul Gauguin, Solasa (Les Parau Parau)
Mijail Larionov, Venus
Iruzkinak
Ilya Mashkov, Alkandora pintatua duen mutilaren erretratua
- Izenburua:
- Ilya Mashkov, Alkandora pintatua duen mutilaren erretratua
- Erakusketa:
- ERRUSIA!
- Gaiak:
- Bildumagintza | Artearen demokratizazioa | Eragin artistikoa | Sorkuntza artistikoa | Lerroa | Mugimendua | Diamante-Txota taldea | Herri-kultura | Errusia | Frantzia | Sergei Shchukin | Tradizioa
- Mugimendu artistikoak:
- Abangoardia | Fauvismoa | Inpresionismoa | Kubismoa | Post-Inpresionismoa | Primitibismoa
- Artelan motak:
- Pintura
- Aipatutako artistak:
- Mashkov, Ilia | Matisse, Henri
Ilya Mashkov‑ek 1909an egin zuen margolan honetan, agerian gelditzen da Errusiako artistak zuen zorra Frantziako modernismoaren inguruko hainbat mugimendurekin, bereziki fauvismoarekin. Fauves direlakoak, hau da, ‘basa piztiak’, talde zabala ziren hogeigarren mendeko lehen hamarkadan, eta Parisen finkatuta zeuden artistek osatzen zuten. Fauvisten ezaugarri nagusiak hauek ziren: marra soilak; kolore bizi‑biziak, naturalak ez zirenak; forma nabarmenegiak; eta bat‑bateko pintaketa. Haien artean, Henri Matisse izan zen pintore nagusia.
Mashkovek Errusiako arte herrikoia ere baliatu zuen. Profil beltzak zakarrak eta lodiak dira, grabatu herrikoietan bezala; mutilaren alkandorako loreek eta margolanaren atzealdeak Errusiako dendetako kartelak dakartzate gogora, eta bereziki dekorazioko pintura lakatu tradizional bat, batzuetan azpil pintura deitzen zaiona. Mugimenduz eta indarrez jositako irudia da: mutilak pose bihurritua du, burua zakar jiratuta, eta haren eskuen jarrera aktiboa da.
Margolan hau sortu eta gutxira, Mashkov kide nagusietako bilakatu zen Errusiako artista talde abangoardista batean, Diamante-Txota taldean, hain zuzen. Taldeak ez zuen luzaro iraun, 1910eko hamarkada besterik ez. Taldeko kideek bisita ugari egin zuten Shchukin‑en pintura modernoen bildumara, 1907az geroztik jendearentzat irekita baitzegoen. Mendebaldeko Europako artisten saioetan aurkitu zuten inspirazioa. Izan ere, Mendebaldeko artista haiek arte soilago, itxuraz berezkoago bat lortu nahi zuten. Belaunaldi bereko beste artista errusiar batzuek bezala, haiek aldi berean, gutxi gorabehera, topo egin zuten inpresionisten, postinpresionisten, fauvisten nahiz kubisten lanekin, eta, beraz, beren lanetan hainbat arte-mugimenduren ezaugarriak bateratzeko joera zuten. Horrez gain, bertako arte herrikoira jo zuten, beren arte primitibista Errusiako iturburuetan sustraitu nahian. 1910 aldera, bi azpitalde sortu ziren. Batean Frantziako artearen oso aldekoak ziren, eta bestean, aldiz, iturburu nazionalak nahiago zituzten. Batzuek zein besteek eragina izan zuten Errusiako artean egon zen garai erradikalaren hasieran, hots, hogeigarren mendeko abangoardia historikoari dagokion garaiaren hasieran.