ERRUSIA!
Vasili Surikov, Elurrezko gotorlekuaren erasoa
Christian Cornelius Krohn, Sergei Shchukin-en erretratua eta Konstantin Korovin: Ivan Morozov‑en erretratua
Iruzkinak
Mikhail Vrubel, Bogatyr
- Izenburua:
- Mikhail Vrubel, Bogatyr
- Erakusketa:
- ERRUSIA!
- Gaiak:
- Artea eta identitatea | Sorkuntza artistikoa | Sormena | Errusia | Literatura herrikoia | Tradizioa
- Artelan motak:
- Pintura
- Aipatutako artistak:
- Repin, Ilia | Vrubel, Mikhail
Mikhail Vrubel-en margolan honen izenburuak, Bogatyr izenak, ‘gizon indartsua’ esan nahi du hitzez hitz. Errusiako ipuin herrikoietako heroietako bat da Bogatyr. Zaldun kristaua da, sir Lancelot‑en errusiar bertsioa. Vrubelek zaldizko ahaltsu gisa irudikatzen du, basoaren gainetik nabarmentzen den erraldoi gisa. Zuhaitzen adaburuak ozta‑ozta iristen zaizkio estriboen parera. Antza denez, Vrubelek aita erabili zuen margolan honetarako modelotzat: izan ere, gizonezkoen edertasuna zahartzaroan indar handiagoz ageri dela uste zuen.
Lan hau Vrubelen margotze-teknika apartaren eta guztiz ezohikoaren erakusgarri ederra da. Estiloaren aldetik, gaiaren aldetik bezalaxe, atzera ere Erdi Arora garamatza. Bere garaikideen zeharo bestelako ikuspuntua da hori. Adibidez, Ilya Repin-ek, Volgako batelariak margolanean, teknika errealista erabili zuen errusiar gizarte modernoaren egia irudikatzeko. Vrubelek dakarkigun maitagarrien ipuinetako eszenak Erdi Aroko artea gogorarazten digu, perspektibaren eta anatomiaren behaketa egokiaren asmakuntzaren aurreko artea. Bereziki aipagarriak dira zaldunaren esku korapilatsuak, Vrubelek margoa lodi eta solte aplikatuta nabarmendutako esku korapilatsuak. Oso irudi apaingarria da, Erdi Aroko erretaularen edo koloretako beiratearen indarrarekin. Margolanaren goialde triangeluarrak efektu hori areagotzen du. Hala ere, egiaz, artistak ez zuen horrelakorik egin nahi izan: mihisea moztu egin zuen lehenengo jabeak, bere etxean gordea zion tokira egokitzearren.
Imajinazio handiko lan hau, 1898an margotua, mende aldaketan nazioartean nagusi zen giroaren zati gisa ikus daiteke: giro horrek errealismo fotografikotik at bultzatzen zituen artistak, mundu ikusgarriaren eta mundu ikusezinaren interpretazio berriak egin zitzaten.