ERRUSIA!
Grigori Miasoedov, Segalariak
Vasili Surikov, Elurrezko gotorlekuaren erasoa
Iruzkinak
Vasili Smirnov, Neron-en heriotza
- Izenburua:
- Vasili Smirnov, Neron-en heriotza
- Erakusketa:
- ERRUSIA!
- Gaiak:
- Heriotza | Sorkuntza artistikoa | Kolorea | Historia-margoa | Historia | Errusia
- Artelan motak:
- Pintura
- Aipatutako artistak:
- Smirnov, Vasili
Neron-en heriotza deritzon obra hau Vasili Smirmov-ek pintatu zuen, 1888an. Errusiako pintura akademikoaren garaiko adibiderik onenetarikoa da, eta, margolan horri esker, Smirnovek San Petersburgoko akademiako kide izatea lortu zuen. Margolanak Neron enperadorearen heriotza laidogarria irudikatzen du. Neron, Erromatar Inperioaren historiako tiranorik krudelenetakoa izan zen. Neronen agintaldiak Kristo ondorengo 54. urtetik 68. urtera bitarte iraun zuen. Gobernatzeko modu gupidagabea izan zuen, eta errugabe franko hil zuen. Horregatik, azkenean, Erromatar Inperio guztia haren aurka jarri zen. Hala, bada, matxinada piztu zen, eta Senatuak adierazi zuen Neron gizartearen etsaia zela. Denek, haren zerbitzari pribatuek barne, bakarrik utzi zuten. Neronek, azkenean, bere buruaz beste egitea beste aukerarik ez zuen izan, eta hil baino lehen honako hitz ezagun hauek bota zituen: “Munduak artista handia galdu du!”. Smirnoven obran, Neron kalean datza, bere odolaren putzuan. Odolaren kolore gorriaren oihartzun tragiko eta kezkagarriak atzematen dira atzeko paretan eta emakumeetako batek eusten dion oihalean. Emakume horiek Neronen hilotza jasotzera bertaratu dira. Egungo ikusleei margolan honek Errusiako Inperioa astindu zuen beste heriotza lazgarri bat ekar diezaieke gogora: 1881ean, iraultzaile erradikalek Alexandro II.a tsarra kalean hil zutenekoa, hain zuzen. Bestetik, etortzear zen Errusiako Iraultza odoltsua iragartzen duen eszenatzat ere jo daiteke.