ERRUSIA!
Kuzma Petrov-Vodkin, Bihotz gaiztoenganako samurtasunaren Andre Maria
Vera Mujina, Iraultzaren garra
Iruzkinak
Alexander Rodchenko, Triptikoa: Kolore gorri garbia, kolore hori garbia, kolore urdin garbia
- Izenburua:
- Alexander Rodchenko, Triptikoa: Kolore gorri garbia, kolore hori garbia, kolore urdin garbia
- Erakusketa:
- ERRUSIA!
- Gaiak:
- Artea eta gizartea | Artea. Teoria | Esperimentazio artistikoa | Sorkuntza artistikoa | Kolorea | Errusia
- Mugimendu artistikoak:
- Konstruktibismoa
- Artelan motak:
- Pintura
- Aipatutako artistak:
- Rodchenko, Alexander
Hiru panel monokromatikok osaturiko multzo honekin Alexander Rodchenko‑k pinturaren bukaera deklaratu zuen. Mihise koloreztatuen hirukoteari izen soil hau jarri zion: Triptikoa: kolore gorri garbia, kolore hori garbia, kolore urdin garbia. Rodchenkok 1921. urtean egin zuen triptikoa, eta mihise hauekin bukatu zuen koloreari eta azaleko planoari buruzko ikerketa: hau da, pintura tradizionala osatzen duten oinarrizko osagaiei buruzko ikerketa. Hiru panelok, bakoitza kolore bakarrarekin margotuta, berariaz bateratzen dituzte pinturaren elementu horiek. Hor ez dago espazio piktorikorik; ez dago mihisearen azaletik urruntzen den perspektibarik; kolorea baino ez dago, garbia eta soila, eta objektu fisikoa. Rodchenko‑k idatziz azaldu zuen keinu erradikal hura 1939an: “Pintura bere ondorio logikora eraman nuen, eta hiru mihise erakutsi nituen: gorria, urdina eta horia. Eta esan nuen: kito. Oinarrizko koloreak. Planoak plano dira, eta ez da irudikapenik izan behar”.
Rodchenkoren eta beste artista ezkertiar batzuen ustez, hurrengo pausoa zen asto gainean sortutako pinturari erabat uztea. Arte hutsa arbuiatzen zuten, bizkarroi jarduera zela uste baitzuten. Horren ordez, beren buruari gizartean erabilgarriagoa zen artea egiteko betekizuna eman zioten. Mugimendu horiek, hala nola konstruktibismoak eta ekoizpenaren arteak, “artea bizitzara” eraman nahi zuten. Ildo horretan, eta hainbat urtez, Rodchenkok bere indarrak diseinu industrialean, propagandako karteletan eta argazkigintzan erabili zituen. Haren xedea zen masei zuzenean mintzatzea, eta era aktiboan eratzea errealitate sobietar berria.