ERRUSIA!
Arkady Plastov, Etxalde kolektiboko jaialdia
Gueli Korzhev, Bandera altxatzen
Iruzkinak
Ilya Kabakov, Espazioraino hegan egin zuen gizona
- Izenburua:
- Ilya Kabakov, Espazioraino hegan egin zuen gizona
- Erakusketa:
- ERRUSIA!
- Gaiak:
- Artea eta espazioa | Artea eta gizartea | Sorkuntza artistikoa | Sinbologia | Errusia | Tradizioa
- Mugimendu artistikoak:
- Arte Garaikidea
- Artelan motak:
- Instalazioa
- Aipatutako artistak:
- Kabakov, Ilya
Areto honetan Ilya Kabakov-en lan bakarra aurkezten da. Ilya Kabakov itzal handieneko errusiar artista da, gaur egun lanean diharduenetan. Kabakov mendebaldean aritu da lanean 1980ko hamarkadaz geroztik, baina bere lanaren zati handienak Errusiako eta Sobietar Batasuneko historia soziala islatzen du. Instalazioak Espazioraino hegan egin zuen gizona du izena. 1981. eta 1988. urteen artean egin zen, hau da, Sobietar Batasunaren azken urteetan. Kabakovek eszenatoki moduko eremua sortu du: etxebizitza komunal batean dagoen oholez itxitako gela txikia iradokitzen du, edo hainbat familiaren bizileku den eta sukalde eta bainugela bera partekatzera behartzen dituen apartamentu bat. Altzari gutxi dago, ohe soil bat eta traste gutxi batzuk besterik ez. Hormetan hainbat testu dago itsatsita, eta suposatzen da poliziari emandako txostenak direla. Gela horretan bizi izandako alegiazko pertsonaiaren historia kontatzen du. Pertsonaia horrek bere burua zerurantz jaurti zuen, eta espazioan desagertu zen.
Bizilagunen azalpenen arabera, bi urte lehenago aldatu zen gelatxora bizitzera. Ezin zuen horma-papera ordaindu, eta hormak posterrekin estali zituen. Hiru lerrotan jarri zituen. Antolamendu horrek ikonostasiaren sobietar bertsio merke moduko bat sortzen du; hots, errusiar elizetako ikonoen antolamendua antzeratzen du. Goian jainkoak daude, hots, kasu honetan, heroi sobietarrak. Erdiko lerroan eguneroko bizitza ageri da. Eta, behealdean, irudi gorrien lerroak infernua sinbolizatzen du. Gelan pertsonaiaren ihes-plana erakusten da. Apartamentutik eta bere bizitzatik ihes egiteko plana da: apartamentu etxeko ganbaratik, etxean egindako katapulta eta lehergailuak erabiliko ditu. Hainbat mapa dago, bai eta pintura bat ere. Horretan Spasky dorrea erakusten da, Plaza Gorritik espaziorantz aireratzen. Hiru dimentsiotako modeloa ere badago: gizonaren kalea ikusten da, eta haren apartamentuaren eraikina. Eraikinetik metalezko zerrenda ateratzen da. Zerrenda horrek aireratzearen noranzkoa adierazten du, Yuri Gagarin sobietar astronauta ospetsuak bezalaxe espazioratzeko planaren arabera. Sabaiko zulo irekitik sartzen den argi zerutiarra da geratzen den guztia, lurreko hondakinez eta, jendea sartzea saiheste aldera, poliziak atean jarritako ohol soilez gain. Gizona aurkitu ez dutela igartzen dugu. Hortaz, eguneroko bizitza murriztaile eta errepikakorretik haratagoko paradisuaren bila irteteko planak arrakasta izan duela ulertzen da.