ERRUSIA!

Iruzkinak

Ilia Repin, Volgako batelariak

Ilia Repin-ek 1870eko hamarkadaren hasieran eginiko margolan hau, Volgako batelariak, errusiar artearen lan sinbolikoenetariko bat da. Hainbat gizon zarpailtsu ageri dira, batel bati sokekin lotuta. Tira eginez, batela ibaian mugiarazten dute. Esaten denez, San Petersburgon Neva ibaiaren ertzean ibilaldia eginda inspiratu zen Repin, margolan hau egiteko. Gazte-talde bat ikusi zuen ibaiertzean picnic egiten; eta, handik gertu, lanean ari zen batelari talde bat. Lan horren kausa izan zen, neurri batean, 1861ean Alexandro II.a tsarrak joputza abolitu izana. Izan ere, jopuak gehienbat nekazariak ziren, eta ez zieten lurrik eman. Beraz, beste edozertan lan egin beharrean izan ziren, gosez hilko ez baziren. Batelei tira egiteko, gizakiak erabiltzea merkeagoa zen zaldiak enplegatzea baino.

Repinek, gero, Volga ibaian lanean ari zen talde bati segitu zion, eta haietako bakoitzaren estudio intentsiboak egin zituen. Azken margolanean, gizon bakoitzaren izaera eta jitea erakusten du; baina, era berean, pairamenari eta sufrimenduari aurre egiteko indar moralari eskainitako monumentu unibertsala ere sortzen du. Irudien prozesioa azpiko aldetik ikusia da, eta horrek dorre bihurtzen ditu, atzealdeko uraren eta zeruaren gainean. Horrela, heroi itxura dute.

Lan akigarriaren irudi honek argi eta garbi erakusten dizkigu Errusian hemeretzigarren mendearen bukaeran zituzten gizarte- eta ekonomia-baldintzak. Lankide dituen gizon zaharragoak ez bezala, erdian den gaztea, uztarria kentzeko keinua egiten ageri dena, badirudi etorkizunaren adierazgarri dela. Izan ere, etorkizun horretan, jendea ez da mugatuko errusiar gizartearen injustiziak pairatzera, baizik eta iraultzaren bidez aurre egingo die injustizia horiei.