ERRUSIA!
Ama Birjinaren iragaitza
Antoon Van Dyck, Autorretratua
Iruzkinak
Rastrelli, Pedro I.aren erretratua
- Izenburua:
- Rastrelli, Pedro I.aren erretratua
- Erakusketa:
- ERRUSIA!
- Gaiak:
- Artea eta politika | Bildumagintza | Sorkuntza artistikoa | Lan-prozesua | Materiala | Sinbologia | Erretratua eta autorretratua | Errusia | Pedro I.a Handia
- Artelan motak:
- Eskultura
- Aipatutako artistak:
- Rastrelli, Carlo Bartolomeo
1703an, Pedro I.a Handiak San Petersburgo sortu zuen, eta hiri hori Errusiako hiriburu bilakatu zen 1712an. Pedro Handiak bidaia franko egin zituen, eta Mendebaldeko Europako eta antzinako artelanak erosi zituen, bere etxe eta jauregi eraiki berriak apaintzeko. Halaber, atzerriko artistak gonbidatu zituen, Errusian lan egin zezaten. Horrela, bilduma inperial handia eratzeko oinarriak finkatu zituen.
Pedro Handiaren benetako grina eskultura zen. Pedro Handiaren brontzezko erretratu hau Carlo Bartolomeo Rastrelli artista italiarrak egin zuen, eta garai horretan egindako enperadorearen monumentuzko eskultura hoberena dela jotzen da. Enperadorearen buruko keinu zorrotzak, haren ile nahasiak, eta erbinude zuriz egindako kaparen tolesturek, oro har, energia, irmotasuna eta indarra adierazten dituzte. Ezbairik gabe, erretratuak antzekotasun fisiko handia du; izan ere, Rastrellik Pedro Handiaren aurpegiarekin egindako argizari-maskara bat erabili zuen. Dena den, Rastrellik ere enperadorearen buruzagitza indartsuaren xehetasun sinbolikoak gehitu zituen. Esaterako, Pedro Handiak ezkerreko bularrean duen ezkutu txikiak 1709an, suediarren kontra irabazi zuen gerra ekartzen du gogora. Era berean, ezkutuaren eskuineko aldean, enperadorea ageri da harrizko emakume armatu bat zizelkatzen. Horrek, Pedro Handia Errusia berri bat eraikitzen ari zela adierazten du. Erretratu hau garai oso baten adierazgarri da, eta Pedro Handiaren eskultura honek mendebaldera begira den Errusia berri eta moderno baten irudia gorpuzten du.