Art in the USA: 300 urteko berrikuntza
Lehenengo atalerako sarrera: Kolonizazioa eta Matxinada
Charles Willson Peale, Benjamin eta Eleanor Ridgely Laming, 1788
Iruzkinak
John Singleton Copley, Soineko urdina daraman emakume baten erretratua (Portrait of a Lady in a Blue Dress), 1763
- Izenburua:
- John Singleton Copley, Soineko urdina daraman emakume baten erretratua (Portrait of a Lady in a Blue Dress), 1763
- Erakusketa:
- Art in the USA: 300 urteko berrikuntza
- Gaiak:
- Artea eta gizartea | Eragin artistikoa | Ibilbide artistikoa | Sorkuntza artistikoa | Erretratua eta autorretratua | Historia-margoa | AEB | Britainia Handia | Tradizioa
- Artelan motak:
- Pintura
- Aipatutako artistak:
- Copley, John Singleton
John Singleton Copley-k 1763an pintatu zuen emakume honen erretratua. Emakume gazte dotorea kolore soileko hondo batean ageri da; hain zuzen ere, kolore soil horiek nabarmendu egiten dute emakumearen edertasun zurbila, haren larruazal bikaina eta haren zetazko soineko dotorearen dirdira. Bere jarrerak eta bere espresio erlaxatuak eta, nolabait, urrunduak berezko dotoretasuna eta segurtasuna helarazten ditu. Ez dakigu nor zen emakume hau, baina, ziurrenik, Copleyk harreman estua zuen familia garrantzitsu batekoa izango zen.
Copleyk kolonia garaiko erretratu finenetakoak sortu zituen. Bere erretratuak hain ziren sinesgarriak, haurrek irudia biziduna zela sinisten zutela esaten baitzen. Hein batean, erretratu ingeles tradizionalaren eragina zuen estiloan egiten zuen lan, eta, hala, Bostoneko eta New Yorkeko eliteko merkatariek enkargu asko egiten zizkioten, haiek ere gustu anglofiloak baitzituzten.
Copleyk arrakasta izugarria izan zuen, erretratuak egiten teknika bikaina zuelako, eta aurrean zuenaren norbanakoa ez ezik, haren gustua, aberastasuna eta gizarte-maila ere helarazten zituelako. Ehundurak eta material aberatsak maisutasunez baliatzen zituen —erretratu honetako ehunak bezala— eta horrek ukimen-kalitate nabari bat, ia sentsuala zena, ematen zion lanari. Gisa honetako erretratuak prestigioaren adierazgarri ziren. Bostoneko eta New Yorkeko etxe dotoreetako atari, egongela eta harrera-geletan jartzen zituzten, rococo altzariekin, portzelanarekin eta bestelako objektu finekin batera. Amerikako Iraultzan amaiera izango zuten tentsioak hazten zihoazen heinean, pribilegio-mundu hori nahasmenduan murgildu zen. 1774an Copleyk Bostongo bere estudioa itxi eta Europara alde egin zuen. Londresen ezarri zen, eta, han, Royal Academyko kide eta erretratu nahiz gai historiko handien pintore errespetagarri bihurtu zen.