Art in the USA: 300 urteko berrikuntza
John Singer Sargent, Barrualdeko eszena Venezian, 1898
Gifford Beal, Neguko arratsaldea, East River, 59. kalea, New York City, 1925
Iruzkinak
William Glackens Jr., Erosleak, 1907–08
- Izenburua:
- William Glackens Jr., Erosleak, 1907–08
- Erakusketa:
- Art in the USA: 300 urteko berrikuntza
- Gaiak:
- Artea eta gizartea | Eragin artistikoa | Sorkuntza artistikoa | Erretratua eta autorretratua | Eszena-generoa | Hiri-eszenak | Ash Can Eskola | Kontsumoa | AEB | New York
- Artelan motak:
- Pintura
- Aipatutako artistak:
- Glackens, William James
Margo hau “Ash Can” Eskolako kide zen William Glackens-ek egina da. XX. mende hasieran zortzi artistek osatutako taldea zen eta eguneroko eta toki arruntetako gaiak zituzten gogokoen, baina hiriko gai gordin eta errealistak ere jorratzen zituzten. Artista talde honek egindako beste lanen adibideak ere ikus daitezke areto honetan.
Margo hau emakumezkoaren kontsumismoan eta edertasunaren ideia modernoetan oinarritzen da. New York hirira egindako begirada bat eskaintzen da bertan. Dotore jantzitako emakume-talde bat ageri da saltegi handi batean erosketak egiten. Irudi nagusiak artistak ongi ezagutzen zituen emakumeen erretratuak dira. Erdialdean bere emaztea dago, Edith Glackens, eta saltzaileak erakusten dion lentzeria ari da aztertzen. Atzetik ikusten dugun emakumea, ezkerraldean eserita, Edithen lagun bat zen, Lillian Travis, kaoba koloreko ile ederra edukitzegatik ezaguna. Eskuinaldean Glackensen beste artista lagun baten emaztea dago.
Margolan hau 1907an hasi zuen artistak, loratzen ari zen New York metropoliko erdi-mailako emakumeen aisialdian saltegi handiek zeresan handia izaten hasi ziren garaian. Margoan Wanamaker saltegia irudikatu zuela uste da, Washington Square ondoan ireki berria baitzen.
Glackens Europan egona zen, eta Diego Velázquez-en, Edouard Manet-en eta Edgar Degas-en lanak ikasi zituen. Lan honen hainbat alderditan artista horien eragina suma daiteke, hala nola, erabili duen paleta goibelean, brotxakada lasaietan eta lan handi eta garrantzitsu baterako eguneroko gai garaikide bat hautatzean.