Edukira zuzenean joan

Van Goghetik Picassora. Thannhauser legatua

katalogoa

Kafetegian 

Izenburua:
Kafetegian 
Argitalpena:
Bilbao: Guggenheim Bilbao, 2018
Neurriak:
23 x 30 cm
Orrialdeak:
175 or.
ISBN:
978-84-95216-86-1
Lege gordailua:
BI-1416-2018
Erakusketa:
Van Goghetik Picassora. Thannhauser legatua
Gaiak:
Artelanak | Lan-prozesua | Teknika eta materialak
Artelan motak:
Pintura
Aipatutako artistak:
Picasso, Pablo

Kafetegian (Au café), Madril, 1901
Conté ziria, paper leunaren gainean, 21,4 × 25,6 cm
Thannhauser Bilduma, dohaintza, Justin K. Thannhauser 78.2514.35
Datarik gabea; behe-eskuineko angeluan sinatua, Conté ziriaz: – P. R. Picasso –
Ez du ur-markarik

Jatorria

Santiago Laporta, Bartzelona; Galerien Thannhauserrek (Justin K. Thannhauser, jabea) Laportarengandik eskuratua, Berlin eta Luzerna, 1932ko abuztuan jada; Luzerna eta Berlinen artean transferitua, ca. 1933ko apirilak 14 (inb. zkiak. 1605 / 61203, “Café”); Justin K. Thannhauserri transferitua, Paris, eta gero New York, 1938ko ekainak 7 (40194. zk.); Thannhauserrek Solomon R. Guggenheim Foundationi legatua, New York, 1978, museoarentzako dohaintza-aginduaren, 1963, eta mailegu luzatuaren arabera, 1976.

Lehen erakusketak

Zürich, Kunsthaus Zürich, Picasso, 1932ko irailak 11–urriak 30 (azaroak 13 arte luzatua), 252. zk. (izen honekin: Café, 1900).
Buenos Aires, Galería Müller (Justin K. Thannhauserrekin batera antolatua), Picasso, 1934ko urria, 28. zk. (izen honekin: Café, 1900).

Materialak eta prozedura

Pablo Picassoren Kafetegian (Au café) obra Conté ziriaz egin zen. Marrazkigintzako merkataritza-tresna bat da Conté ziria, pigmentu prentsatuz eta buztinez egina, eta paperaren gainaldean pigmentu argitsua eta oso matea uzten du1. Pastelarekin edo ikatz-ziriarekin alderatuta, Conté ziria askoz ere marrazketa-tresna gogorragoa eta trinkoagoa da, eta lerroaren ezaugarrien erregistro zabalagoa ahalbidetzen du: trazu fin eta delikatuetatik hasita, eremu zabal eta guztiz opakuetaraino. Kafetegian obrako lerroen lanketaren parte handi bat berariaz definitugabea eta lausotua geratzen den arren, mostradorearen atzean zutik dagoen gizonaren erretratu dotorea zenbait marra harrigarri fin eta delikatuen bitartez osatu zen, zeinak ziria zorroztuz eta punta fina aterata lortu baitziren. inondik ere. Mostradore atzeko gizonarekin alderatuta, kontraste bizia eragiten du bere ezkerrean dagoen gizon handikotearen karikaturak. Era berean, mostradoreari begira dagoen gizonak, hasieran, neguko arropa beltzezko fardel ilun bat ematen du, baina Picasso gauza izan zen trazurik txikienarekin betaurrekoen alanbrezko montura bat marrazteko, eta zehaztasun berberaz daude gauzatuak haren sudurra eta bibotea.

Picassok tarteko gramajeko paper leun bat erabili zuen, azaleko testura moderatu batekin, eta horrek ahalbidetu zion pigmentua paperaren azalerako punturik gorenetan bakarrik ipintzea, testura-bilbe bat utziz tonu argi eta tartekoen eremuetan; Georges Seuratek (1859–1891) hobetu zuen teknika hura. Conté ziriaren presioa areagotuz eta pasadak behin eta berriz errepikatuz, Picassok orobat berregin ahal izan zituen konposizioaren eremu beltz kontzentratuak eta belusatuak. Papera moztu egin zen, ertz irregularrekin, konposizioa bere lau aldeetan laukiztatzen duten lerro beltzei jarraiki, antza denez. (JW) 

[Itzulpena: Rosetta;
Egokitzapena: Guggenheim Bilbao Museoa]

Oharrak

  1. Conté ziriaren deskribapen xeheago baterako, ikus Karl Buchberg, “Seurat: Materials and Techniques”, in Jodi Hauptman, Georges Seurat: The Drawings, erak. kat., Museum of Modern Art, New York, 2007, 30–41. or.; Kimberly Schenck, “Crayon, Paper, and Paint: An Examination of Nineteenth-Century Drawing Materials”, in Jay McKean Fisher et al., The Essence of Line: French Drawings from Ingres to Degas, erak. kat., Baltimore Museum of Art eta Walters Art Museum, Baltimore, 2005, 65–66. or. Kafetegian obra hemen ageri da: Christian Zervos, Pablo Picasso, 1. alea, Cahiers d’art, Paris, 1932, 37. zk., 18. xafla (izen honekin: Le comptoir [The Counter], 1900). [itzuli]

 

PDF-a JAITSI